Энэ удаагийн хурлыг Эрүүл мэндийн сайдын ахлах зөвлөх М.Туяа удирдан явуулсан бөгөөд ЭМЯ-ны Эмнэлгийн тусламжийн хэлтсийн дарга Я.Амаржаргал, НЭМХ-ийн мэргэжилтэн Г.Соёлгэрэл, НЭМХ-ийн мэргэжилтэн Н.Цогзолмаа, Сүхбаатар аймгийн ЭМГ-ын НЭМХ-ийн дарга М.Энхтуяа болон холбогдох албаны хүмүүс, аймаг, нийслэлийн эрүүл мэндийн байгууллагын төлөөлөл цахимаар оролцлоо. Хурлыг нээж Эрүүл мэндийн сайдын ахлах зөвлөх М.Туяа “Эх, хүүхдийн эрүүл мэндийг дэмжих жил”-ийн хүрээнд өнгөрсөн долоо хоногт хийгдсэн ажлууд, эх, хүүхдийн эрүүл мэндийн үзүүлэлтийг сүүлийн долоо хоногийн байдлаар танилцууллаа. Манай улсад өнгөрсөн долоо хоногт 1595 хүүхэд мэндэлж, эхийн эндэгдэл гараагүй байгаа нь өмнөх саруудтай харьцуулахад хэвийн байгааг хэлж, жирэмсний хяналт, эрт нярайн үеийн тусламжийн чанарт анхаарахыг санууллаа.
Өнгөрсөн долоо хоногт болсон онцлох үйл явдлаас дурдвал, Монгол, Швейцарийн хамтарсан “Нярайн түнхний үений дутуу хөгжлийг эрт илрүүлэх, мултралаас сэргийлэх эмчилгээ” төсөл манай улсад 2008 оноос хэрэгжиж эхэлсэн. Энэхүү төслийн үйл ажиллагаанд гар бие оролцсон Швейцарийн холбооны улсын иргэн, хүүхдийн эмч Раул Шмит, Томас Бауман нарыг Эрүүл мэндийн сайд Н.Удвал хүлээн авч уулзан, манай улсын эрүүл мэнд, түүний дотор нярай хүүхдийн эрүүл мэндийг хамгаалахад оруулж буй хувь нэмрийг өндрөөр үнэлсэн. Энэхүү төсөл нь өргөжин бусад аймаг, дүүргүүдэд үндэсний хөтөлбөр болон хэрэгжихээр болсон байна.
Мөн “Оюутны дэмжих сар”-ын аяны хүрээнд хөтөлбөрт тусгагдсан ажлууд болох цусны донор бэлтгэх, БЗХӨ-өөс сэргийлэх сургалт зохион байгуулж байгааг хэллээ.
Эх, хүүхдийн тусламж, үйлчилгээний хүртээмж, чанарыг үнэлэх дэмжлэгт хяналтын 2 дахь үе шат эхлэсэн ба өнгөрсөн долоо хоногт 2 аймагт явагдаж байгааг дуулгалаа.
ЗГХЭГ-аас яамдын үйл ажиллагаагаа хэрхэн мэдээллэж, сурталчилсан байдлаар нь байр эзлүүлсэн бөгөөд ЭМЯ 3-р байр эзэлсэнийг дуулгаж, цаашид хэвлэл мэдээллийн хэрэгслээр үйл ажиллагаагаа сайн сурталчилж таниулж байхыг эрүүл мэндийн байгууллагын удирдлагуудад захиад, энэ чиглэлийн мэдээ, мэдээллийг ЭМЯ-ны цахим хуудсанд ирүүлэхийг хүслээ.
ЭМЯ-ны НЭМХ-ийн мэргэжилтэн Н.Цогзолмаа хүүхдийн осол гэмтлийн талаар мэдээлэл хийлээ. Тэрээр, эцэг, эхийн үр хүүхэддээ тавих хараа, хяналт суларсанаас болж ихэвчлэн усанд живэх, түлэгдэх, амьсгал бүтэх, зам тээврийн осолд өртөх зэргээр амиа алдах явдал их байгааг онцолж, анхаарал сэрэмжийг эцэг, эхчүүдэд ойлгуулж, ухуулах арга хэмжээ дутмаг байгааг хэлж байлаа.
Мөн энэ удаагийн цахим хуралд “Эх, хүүхдийн эрүүл мэндийг дэмжих жил”-ийн хүрээнд “Хүүхдийн хоол, тэжээлийг сайжруулахын тулд аймгийн төв, сумын бүх сургууль, цэцэрлэгийн хоол, Үдийн цай хөтөлбөрийн үйл ажиллагаанд дэмжлэгт-хяналтыг хийж, олсон амжилт,сургамж, туршлагаасаа Сүхбаатар аймгийн ЭМГ-ын НЭМХ-ийн дарга М.Энхтуяа хуваалцлаа. Өмнө нь тус аймгийн сургууль, цэцэрлэгт пүнтүүз, гоймонгоор хоол хийдэг, хятадад үйлдвэрлэсэн хүнсний бүтээгдэхүүнийг (гоймон, пүнтүүз, хоол амтлагч) ихээр худалдан авч нөөцөлсөн, цагаан идээ, сүү хангалттай хэрэглэдэггүй зэрэг олон дутагдал байсан. Харин өнөөдөр дэмжлэгт хяналтын хүрээнд сургууль, цэцэрлэгийн захирал, эрхлэгч, тогооч, нярав нарт “Хүүхдийн зөв зохистой хооллолт” сэдвээр сургалт явуулж, эрүүл хүнсээр хангах боломжтой болсоноор эцэг, эхчүүдээс сайшаал хүртсэн хүүхдийн эрүүл мэндэд тустай ажил болсоныг дурдлаа.
