Орхон аймаг дахь Бүсийн оношилгоо, эмчилгээний төвд хөнгөвчлөх эмчилгээний тасаг нээгдлээ. Тус төвийн дотрын тасгийн хоёр өрөөг хөнгөвчлөх эмчилгээний зориулалтаар тохижуулж, энэ сарын 16-ны өдөр нээлтээ хийлээ. "Итгэл - Хавдаргүй Монгол” Үндэсний сангийн тусламжаар 20 гаруй сая төгрөгийн тоног төхөөрөмжийг суурьлуулжээ.
Уг нээлтийн ажиллагаанд Монгол Улсын Тэргүүн хатагтай "Итгэл - Хавдаргүй Монгол” Үндэсний сангийн тэргүүн Х.Болормаа, нарийн бичгийн дарга С.Нарангэрэл, ХСҮТ-ийн Хөнгөвчлөх эмчилгээний тасгийн эрхлэгч Л.Мөнгөнцэцэг, Аймгийн Засаг дарга Г.Зоригт, Эрүүл мэндийн газрын дарга Г.Баясгалан, БОЭТ-ийн захирал Ч. Цэрэндагва, Хавдарын эмч С.Тунгалаг болон БОЭТ-ийн хамт олон оролцлоо.
Хөнгөвчлөх тасаг нээгдсэнээр идэвхитэй даамжирч байгаа эдгэрэшгүй өвчтөнд амьдралын чанарыг дээшлүүлэх, идэвхитэй удаан хугацаагаар өвдөлтгүй амьдрахад туслах ач холбогдолтой.
“Бүсийн оношилгоо, эмчилгээний төвд өдрийн цагаар хөнгөвчлөх эмчилгээ хийгдэж байна. Удахгүй барилгын өргөтгөл ашиглалтад орохоор хэвтэн эмчлүүлэгчдээ хүлээн авна” гэж хөнгөвчлөх тасгийн эмч Л. Мөнгөнчимэг хэллээ.
