Эрүүл мэндийн яамнаас 2014 оныг “ Эх, хүүхдийн эрүүл мэндийг дэмжих жил” болгон зарлаж, 01 тоот тушаалаар жилийн хүрээнд хийх ажлын төлөвлөгөөг батлан, орон нутгийн түвшинд аймгийн Засаг даргын 25 тоот захирамжаар мөн жилийн хүрээнд хийх ажлын төлөвлөгөөг батлуулан бүх сум, багийн Засаг дарга нар болон эрүүл мэндийн төвүүдэд хүргүүлэн ажиллаж байна. Уг төлөвлөгөөний хүрээнд дараах ажлуудыг зохион байгуулан ажиллаж байна. Үүнд:
- Эмнэлгийн тусламж үйлчилгээ чанарыг сайжруулах эмч, мэргэжилтнүүдийг чадавхижуулах зорилгоор ажлын байрны дадлагажих сургалтыг зохион байгууллаа. Уг сургалтын хүрээнд хөдөөгийн нэгдсэн эмнэлгийн нарийн мэргэжлийн 8 их эмч, сумдын шинэ залуу 5 их эмч, сумын эх баригч бага эмч 8, өрх, сумын 22 сувилагч, эх барих, эмэгтэйчүүдийн зөвлөх эмч бэлтгэх сургалтад 1 эмч тус тус хамрагдлаа.
- “Дэлхийн эмч нарын баяр”-ыг угтан ахмад эмч нарын санаачлагаар төр, хувийн хэвшлийн эрүүл мэндийн байгууллагын 120 их эмч, мэргэжилтнүүд Сайншандын 1200 өрхийн өндөр настан хөгжлийн бэрхшээлтэй иргэд, эмэгтэйчүүд, хүүхдэд гэрийн идэвхитэй эргэлт, үзлэгийг зохион байгуулсан. Мөн эх, хүүхдийн аминд аюултай шинжүүд, хүүхдийн осол гэмтлээс сэргийлэх, ямар үед эмч, эмнэлэгт хандах, хүүхдийн шүдийг арчлах талаарх зөвлөмж, гарын авлага тарааж, зөвлөгөө өглөө. Ингэснээр иргэдийн хүүхдийн өвчин болон жирэмсэн эхийн аюултай шинжийн талаарх мэдлэг, хандлага дээшилсэн байна.
- “Эхчүүдийн эрүүл мэндийг сайжруулах” нөхөн үржихүйн насны эмэгтэйчүүдийн урьдчилан сэргийлэх үзлэгийн 3 сарын аяныг зохион байгуулан нийт 7702 охид, эмэгтэйчүүд хамрагдсан байна.
- Өрх толгойлсон, олон хүүхэдтэй, хөдөлмөрийн чадвар түр алдалттай, амьжиргааны баталгаажих түвшингөөс доогуур орлоготой 20 өрхийн эмэгтэйчүүдийг сонгож, эх барих эмэгтэйчүүдийн эмчийн урьдчилан сэргийлэх үзлэг, шинжилгээнд хамруулж, жирэмслэлтээс сэргийлэх арга, гэр бүл төлөвлөлтийн сургалтад хамруулав. Энэ ажлын үр дүнд хөх умайн хүзүүний үзлэг 3,3 хувь, жирэмсний эрт үеийн хяналт 1,9 хувь нэмэгдэж, эрт нярайн эндэгдэл 9 промиллиор буурч, эмнэлгийн тусламжийг үзүүлэлт сайжирсан байна.
Цаашид:
- “Эх, хүүхдийн эрүүл мэндийн тулгамдсан асуудал, салбар хоорондын хамтын ажиллагаа” зөвлөгөөнийг 09 дүгээр сарын 25-ны өдөр зохион байгууллахаар төлөвлөөд байна.
- Нэгдсэн эмнэлэг, сум, өрхийн эрүүл мэндийн төвийн бүтэц үйл ажиллагааны стандарт 2013 онд шинчлэгдсэн бөгөөд 2014 оны 09 дүгээр сарын 01-нээс эхлэн мөрдөгдөж байна. Энэхүү стандартаар Аймгийн хэмжээнд үйл ажиллагаа явуулж буй сум, өрхийн эрүүл мэндийн төв, нэгдсэн эмнэлгүүдийн тоног төхөөрөмжийн хангалт дунджаар 60 хувьтай байна.
Шинэчлэгдсэн стандартын дагуу эрүүл мэндийн төв, нэгдсэн эмнэлгүүдэд шаардлагатай байгаа эмнэлгийн тоног төхөөрөмжийн судалгааг гарган Эрүүл мэндийн газрын даргын 2014 оны 250 дугаар албан бичгээр ЭМЯ-нд хүргүүллээ.
2014 онд шинээр нийлүүлэгдсэн тоног төхөөрөмж:
Монгол Улсын Засгийн газрын “ЭРҮҮЛ МОНГОЛ ХҮН” хөтөлбөрийн хүрээнд 11 аймгийн нэгдсэн эмнэлгийг оношилгооны төвтэй болгох зорилтыг хэрэгжүүлэх зорилгоор аймгийн нэгдсэн эмнэлэгт 15 нэр төрлийн 2,16 тэрбум төгрөгийн 43 ширхэг оношилгоо, эмчилгээний тоног төхөөрөмж нийлүүлж, оношилгооны төвийн нээлтийг 2014 оны 04 сарын 1-нд хийсэн.
Тоног төхөөрөмжийн хангалтыг нэмэгдүүлэх зорилгоор улсын төсвийн хөрөнгөөр 28 нэр төрлийн 323,2 сая төгрөгийн тоног төхөөрөмжийг төрийн өмчийн 21 эрүүл мэндийн байгуулагт нийлүүлэхээр болоод байна. Мөн нийгмийн эрүүл мэндийн төвийн тохижилтод зориулан 14 нэр төрлийн 38,4 сая төгрөгийн тоног төхөөрөмжийг 2014 оны 08 сард нийлүүлсэн.
Тоног төхөөрөмжийн хангалтыг нэмэгдүүлэхэд орон нутгаас дэмжиж ажиллаж байна. Аймгийн Засаг даргын 2014 оны А/270 дугаар захирамжаар эх нярайн эрүүл мэндийн тусламж үйлчилгээнд нэн шаардлагатай байгаа 9,9 сая төгрөгийн 3 нэр төрлийн 34 ширхэг эмнэлгийн тоног төхөөрөмжийг сум, өрхийн эрүүл мэндийн төв, нэгдсэн эмнэлгүүдэд 2014 оны 09 сард нийлүүлэхээр төлөвлөн ажиллаж байна.
