Эрүүл мэндийн яамны Бодлогын хэрэгжилтийг зохицуулах газрын Эмнэлгийн тусламжийн хэлтэс, Эрүүл мэндийн хөгжлийн төв, Монголын сувилагчдын нийгэмлэгтэй хамтран “Гамшиг, онцгой байдал ба сувилахуй” сэдэвт цахим зөвлөгөөнийг энэ сарын 02-ны өдөр анх удаа зохион байгуулав.
Гамшиг онцгой байдлын үед сувилахуйн тусламж, үйлчилгээний бэлэн байдлыг хангах, хүний нөөцийн чадавхийг нэмэгдүүлэх зорилготой уг зөвлөгөөнд 21 аймгийн Эрүүл мэндийн газрын Эмнэлгийн тусламжийн хэлтсийн дарга, яаралтай болон онцгой байдлын асуудал хариуцсан мэргэжилтэн, сувилгааны албаны дарга, аймаг, нийслэлийн эрүүл мэндийн байгууллагын 460 гаруй сувилагч, мэргэжилтнүүд хамрагдлаа. Зөвлөгөөнийг нээж Эрүүл мэндийн яамны Бодлогын хэрэгжилтийг зохицуулах газрын дарга Я.Буянжаргал хэлсэн үгэндээ, “Дэлхий дахинд шинэ болон шинээр сэргэж буй халдварууд, дэлхийн дулаарал, уур амьсгалын өөрчлөлт, байгалийн болон хүний хүчин зүйлийн нөлөөлөл нь гамшигт хүргэх өндөр эрсдэл агуулж, гамшгийн тоо, давтамж, учруулах хохирол, тааламжгүй үр дагавар өсөн нэмэгдэж байгаа өнөө үед хүний амь эрсдэхээс урьдчилан сэргийлэх, бэлэн байдал, хариу арга хэмжээ нөгөө талаар гамшгийн үеийн тусламж, үйлчилгээг үзүүлдэг сувилагчийг сургах асуудал нэн чухал” гэдгийг онцлов. Гамшиг онцгой байдлын үеийн эрүүл мэндийн тусламж үйлчилгээний талаар хэрэгжүүлж буй үйл ажиллагаа, цаашдын чиг хандлага, болзошгүй гамшиг онцгой байдал- хүний эрүүл мэндийн нөлөөлөл сэдвээр ЭМЯ-ны БХЗГ-ын Эмнэлгийн тусламжийн хэлтсийн мэргэжилтэн Ч.Баярмаа, Гамшиг онцгой байдлын үеийн сувилахуйн тусламж үйлчилгээний асуудлаар ЭМЯ-аас баримталж байгаа бодлого, чиглэлээр ЭМЯ-ны БЗХГ-ын Эмнэлгийн тусламжийн хэлтсийн мэргэжилтэн С.Алтанбагана, Гамшиг онцгой байдлын үеийн сувилахуйн тусламж үйлчилгээний асуудлууд, Гамшгийн үеийн сувилахуйн ОУ-ын чиг хандлага, гамшиг онцгой байдлын дараах үеийн сувилахуйн тусламж үйлчилгээг зохион байгуулах бусад орны туршлага мөн өөрийгөө хэрхэн хамгаалах талаар Монголын сувилагчдын нийгэмлэгийн тэргүүн Д.Нямсүрэн нар илтгэл танилцуулав. Олон улсын сувилагчдын нийгэмлэгээс “Болзошгүй гамшгийн үед сувилагчийн гүйцэтгэх үүргийг “Сувилагч нь гамшгийн болон түүнд бэлэн байх үйл ажиллагаанд мэргэжлийн ур чадвар, техник сэтгэлгээ, халдвар хамгаалал, физиологи, эмзүйн болон харилцаа, ёс зүйн олон талын мэдлэгтэй байх шаардлагатай” гэж тодорхойлсон байдаг. Мөн Ази, Номхон далайн орнуудын Яаралтай тусламж болон гамшгийн үеийн сувилахуйн YII хурлаас “Гамшгийн үеийн сувилахуйн тусламжийн цогц чадамжийг дээшлүүлэх” зорилтыг хэлэлцэж баталсан байна. Иймд аливаа болзошгүй гамшиг, онцгой байдлыг болсон хойно нь биш, болохоос нь өмнө урьдчилан сэргийлэх, бэлтгэл, бэлэн байдлыг хангах, гамшигт өртсөн хүн, гэр бүл болон олон нийтийн болон түүнээс эдгэрч илааршихад нь үр дүнтэй сувилахуйн тусламжийг хүргэх асуудал чухалаар тавигдаж өнөө үед гамшгийн үеийн сувилахуйн тусламжийн цогц чадамжийг бүрэн эзэмшсэн чадвартай мэргэжилтэн сургах зорилгоор энэхүүсургах сургалт, семинарыг зохион байгуулсан байна. Гамшгийн үеийн сувилахуйн тусламжийн цогц чадамжийг бүрэн эзэмшсэн чадвартай мэргэжилтэн болохыг нийт сувилагчиддаа уриалснаар уг хуралдаан өндөрлөлөө .