Шинэчлэлийн засгийн газар, Хууль зүйн салбарын шинэчлэл, мэдээллийн ил тод байдлын тухай хуулийн зарчмын дагуу шүүхийн шийдвэр гүйцэтгэх байгууллагын бодлого, үйл ажиллагааг нээлттэй мэдээлэх, сурталчлах, цаг үеийн мэдээ, мэдээллийг иргэдэд хүргэх зорилго бүхий тус байгууллагын www.cd.gov.mnвэб сайт шинэчлэгдэн өөрчлөгдөөд багагүй хугацаа өнгөрч байна.
Уг вэб сайтад санхүү, хүний нөөц, үйл ажиллагааны талаарх мэдээ мэдээллийг түлхүү оруулж өгсөнөөс гадна хүмүүжигчдийн хийсэн бүтээлийн онлайн дэлгүүрийг шууд хандалтаар оруулж өгсөнөөрөө онцлог болсон юм.
Шүүхийн шийдвэр гүйцэтгэх байгууллагаас хүмүүжигчдийг нийгэмшүүлэх ажлын хүрээнд тэднийг ажил мэргэжлийн чиг баримжаатай болгох, хөдөлмөр эрхлүүлж, цалин олгох, цалингаас нь бусдад учруулсан гэм хорыг хохирол, төлбөрийг барагдуулж, нэрийн данс нээн цалингийн хуримтлалтай болгож, суллагдан гарахад нь хуримтлагдсан цалинг олгон ажиллаж байна. Дээрх онлайн дэлгүүрийг энэ зорилтын хүрээнд иргэдийн дунд хүмүүжигчдийн гар урлалын болон үйлдвэрлэсэн бүтээл, бүтээгдэхүүн ихэд эрэлттэй байдгийг үндэслэн нээсэн юм. Онлайн дэлгүүр иргэдэд хүмүүжигчдийн бүтээл, бүтээгдэхүүнийг үзэж сонирхон, худалдан авах боломжийг бүрдүүлж байгаа юм.
Өнөөдөр ШШГЕГ-ын харьяа хорих анги, алба, салбар, нэгжүүдэд ял эдлэж буй хүмүүжигчид төрөл бүрийн чулуун шатар, арслан, сандал ширээ, модон сийлбэр /гэрийн мод, тавилга, морин хуур, ширээт шатар, сувинер/, хайчилбар, уран зураг, эсгий урлал, оёдол, хатгамал, гутал /Монгол, Буриад/, мөн барилгад ашигладаг хөнгөн блок, тоосго, замаск, шохой, шохойн чулуу, эрдэс нунтаг /авто замын асбальт бетоны хольц/, дэлхийн хамгийн хатуулагт ногоон боржин чулуун хавтан /явган хүний замын шоо хэлбэртэй хавтан/, вакум цонх, хаалт, хаалга зэрэг бүтээгдэхүүнийг үйлдвэрлэж байна. Түүнчлэн дээрх бүтээгдэхүүнүүдийг худалдан авагч өөрийн хүссэн өнгө, загвар, хэмжээгээр захиалж хийлгэх бүрэн боломжтой юм.