Хүүхдийн төлөө үндэсний газрын дарга И.Нарантуяа өнөөдөр буюу 6 сарын 13-нд Монгол улсад 1994 оноос эхлэн хүүхэд, залуучууд, гэр бүлийн хөгжил, хүүхдийн эрхийн хэрэгжилтийг дэмжих чиглэлээр үйл ажиллагаа явуулж байгаа Норвегийн Тусламжийн Байгууллагын Монгол дахь суурин төлөөлөгч Бертил Андерссоныг хүлээн авч уулзлаа. Тус байгууллага нь хөдөөгийн алслагдсан сум орон нутагт сургуулийн дотуур байрны орчныг сайжруулах, хүүхэдтэй ажилладаг багш, ажилчдын хандлагыг өөрчлөх, боловсон хүчнийг чадавхжуулах, хүүхдийн эрхийг орон нутагт сурталчлах зорилгоор 2009-2013 онд “Хүүхдийн эрх, хөгжил 1” төслийг хэрэгжүүлсэн юм. Энэхүү төслийн үргэлжлэл 2014-2018 онд Ховд, Баян-Өлгий аймагт “Хүүхдийн эрх, хөгжил 2” нэртэй үргэлжлэх ба гол түнш хамтрагч байгууллага нь Хүүхдийн төлөө Үндэсний газар байх юм.
