ХТҮГ-ын харьяа “Өнөр бүл” төвийн /хуучинаар Хүүхэд асран хүмүүжлүүлэх төв/ багш, ажилтнуудын өдөр тутмын үйл ажиллагаанд ахиц дэвшил олон гарч байгаа бөгөөд, хүүхдийг дотуур байрны нөхцөл байдлаас бие даасан амьдралд бэлтгэх, нийгэмшүүлэхэд анхаарч ажиллаж байна. Хүүхдийн тоогоор харилцах дэвтэр нээн анги удирдсан багш нар, нийгмийн ажилтнуудтай мэдээлэл байнга солилцож байна. Үүний үр дүнд тухайн өдрийн хичээлийн идэвх оролцоо, дэг журам, сургуулийн үйл ажиллагааны талаарх анхаарал татсан асуудлуудыг тухай бүрд нь мэдээлэл солилцон 53, 55-р сургуулийн багш нартай хамтын ажиллагаа нээлттэй болж, гарсан асуудлыг тухайн цаг хугацаанд нь шийдвэрлэж байна. Цэцэрлэгийн насны хүүхдүүдээ хамран сургах тойргийн 10 цэцэрлэгт явуулж, дотуур байранд амьдардаг хүүхдүүдийн ариун цэвэр, соёлжилтод анхааран солих хувцаснуудыг төрөлжүүлэн, сайжруулж байна. Үүний үр дүнд хүүхдүүд өөрсдөө хувцсаа угаадаг болж, цэвэрхэн хувцаслахад анхаардаг болж байна. 2014 онд 11-р анги төгсч байгаа хүүхдүүдийнхээ хонхны баярыг нь хамтран тэмдэглэлээ.
Хүүхэд хөгжил, хамгааллын төвийг “Өнөр бүл” төвтэй нэгтгэж байгаатай холбогдуулан ХТҮГ-аас томилогдсон ажлын хэсэгтэй хамтран эд хөрөнгө, ажил хүлээлцэн, тус төвд амьдарч байгаа хүүхдүүдийн кейс файлтай танилцаж, үйлчилгээний үйл явцтай танилцан, бүртгэл хийлээ.СЭМҮТ-д хэвтэн эмчлүүлэх шаардлагатай хүүхдийн сэтгэц, зан үйлийн тодорхойлолтыг гаргаж, хэвтэн эмчлүүлэх нэн шаардлагатай байгаа 2 хүүхдийг хэвтүүлж эмчлүүлж байна. ЭНЭМТ-өөс нарийн мэргэжлийн эмч нар ирж 111 хүүхдийг урьдчилан сэргийлэх үзлэгт хамруулан, Эрүү Нүүр Эмгэг Судлалын төвийн шүдний эмчид цэцэрлэгийн насны хүүхдүүдэд шүдний эмчилгээ хийсэн.
БЗД-ийн Халамжийн хэлтэстэй хамтран хүүхдүүдийн Хүний хөгжил сангийн мөнгөний олголтыг тогтмол хянаж байна.Багш нар, ажилтнуудын хариуцлагыг өндөржүүлэх үүднээс багш нарын хариуцлагын талонтой болгон ажиллуулж байна.
Гэр бүлд түшиглэсэн халамжийн хувилбарт үйлчилгээг тасралтгүй хүргэх, төвд амьдарч буй гэр бүлд нь эргэн нэгтгэх боломжтой, хүүхдээ авахаар бэлтгэж буй гэр бүлд зөвөлгөө өгч, БЗД-ийн Нийгмийн хөгжлийн хэлтэс, Дархан-Уул аймгийн Хүүхэд, гэр бүл хөгжлийн хэлтэстэй хамтарч ажиллаж байна.
ХТҮГ-аас зохион байгуулж буй асрамж, халамжийн төвүүдийн уулзалт, Нээлттэй халганы өдөрлөг, ОУ-ын Гэр бүлийн өдөр зэрэг үйл ажиллагаанд амжилттай оролцон, үйл ажиллагаагаа сурталчлан, хүүхдүүд урлагийн тоглолт олон нийтэд толилууллаа. “Өнөр бүл” төвд авьяаслаг хүүхдүүд, багш нар олон байдаг. Төвийн хамт олны төлөөлөл Хүн амын хөгжил, нийгмийн хамгааллын яам ХТҮГ-аас зохион байгуулсан Урлагийн их наадамд хамт олноо төлөөлөн уран нугаралт, ардын бүжиг, язгуур урлаг, цэнгээнт бүжгийн төрлөөр оролцсон. Тус наадамд ХТҮГ-ын багтай хамтран тэргүүн байрын шагнал хүртсэн юм. Гадаад харилцааны сайдын нэрэмжит “Хэлтэй бол хөлтэй” англи хэлний уламжлалт XI олимпиадад “Өнөр Бүл Төв”-ийн Олдох овогтой Баасанхүү амжилттай оролцож Стандарт сургалтын ангилалд Тэргүүн байрыг эзлэв.
МОНГОЛ УЛСЫН ХҮҮХЭД ГЭР БҮЛ ХӨГЖЛИЙН “ӨНӨР БҮЛ” ТӨВ