“Нэг нүүдэл хийх гэж 1.10 цаг суусан. Би хожно, өрсөлдөгч маань тэнцэнэ гэж хичээсэн болохоор ийм удаан хугацаагаар сууснаа хэн хэн нь анзаараагүй өнгөрүүлсэн байна лээ” хэмээн даруухан өгүүлээд инээмсэглэсэн хүүг Г.Мөнхбаяр гэдэг. 2014 оны дөрөвдүгээр сарын 25-наас энэ сарын 3-ныг хүртэл Сингапур улсад болсон Шатар сонирхогчдын Дэлхийн аваргын тэмцээний ялагч, Дэлхийн спортын шинэхэн мастер тэрбээр Баянзүрх дүүргийн 9 дүгээр хорооны иргэн, ерөнхий боловсролын 79 дүгээр сургуулийн 11дүгээр ангийн сурагч юм. Ингээд 16-хан настай оюун ухааны мастер, ирээдүйтэй залуу тамирчин Г.Мөнхбаярын ярилцлагыг уншигчиддаа хүргэе.
-Шатрыг оюун ухаанаас гадна тэсвэр тэвчээрийг сорьдог спорт гэдэг. Энэ үгтэй санал нийлдэг үү?
-Шатар тоглоход хүний оюун ухааныг сорьж, тэсвэр тэвчээрийг шалгадаг. Аав маань намайг анх шатар тоглож эхлэхэд “сууж сур” гээд хоёр гарыг зөрүүлж тавиулаад хэдэн цагаар ширээн дээр томоотой суулгадаг байсан. Эрэгтэй хүүхэд хөдөлгөөнтэй, үймүүлж, тоглох маш дуртай. Гэтэл тэр бүхнийг маань хорьж хэдэн цагаар нэг газар нэгэн хэмээр суулгахад хүн шантарч болно. Миний хувьд шатар тоглох үнэхээр сонирхолтой байсан болохоор хэдэн цагаар хөдөлгөөнгүй суухаас шантраагүй. Энэ сурсан зан маань сая тоглосон Дэлхийн аварга шалгаруулах тэмцээний үеэр маш их хэрэг болсон. Учир нь би энэ тэмцээнд дасгалжуулагч байхгүй, ганцаараа очиж оролцсон илүү хөдөлгөөн хийвэл л шар карт авч, оноогоо алдах байсан. Тиймээс тоглож дуусаад л гараа зөрүүлж тавиад л нам суудаг байсан. Бие хөшиж, бие засмаар байсан ч тэсээд л суугаад байсан. Энэ тэвчээр маань дэлхийн спортын мастер цол авч, шатрын дэлхийн аварга болоход их нөлөөлсөн гэж бодож байгаа. Тиймээс аавдаа, таны хэлснээр би сууж, тэвчиж байсан болохоор энэ медальд хүрсэн. Тиймээс миний амжилтын багагүй хэсэг нь таны зүтгэл, итгэл байсан гэдгийг хэлээд,”аавдаа баярлалаа” гэж хэлмээр байна.
-Дэлхийн аваргын тэмцээнд хэдэн орны хичнээн хүн оюун ухаанаараа өрсөлдөв?
-Энэ удаагийн тэмцээнд нийт 37 орны 184 тамирчин өрсөлдсөн. Манай улсаас 15 тамирчин оролцож,өндөр амжилт гаргалаа. Эрэгтэй төрөлд би аварга болж, Олон улсын Шатрын холбооны мастер цол хүртсэн. Харин II байрт Ч.Ачбилэг, эмэгтэй төрөлд Ү.Үүрийнтуяа хүрэл медаль хүртэж, дэд мастер зэрэгтэй болсон.
- Шатар сонирхогчдын Дэлхийн аваргын тэмцээний онцлог нь насны хязгааргүй тоглодог, өрсөлдөөн ихтэй, нэр хүндтэй тэмцээн. Чиний өрсөлдөгчдийн хувьд ахмад нь ямар хүн байв?
-Миний тоглосон хүмүүсээс хамгийн ахмад нь Филлипин улсын тамирчин, 30 гаруй л настай ахмад тоглогч. Энэ хүнээс гадна, олон ахмад тамирчид тэмцээнд оролцсон ч надтай тоглолт таараагүй, өнгөрсөн. л доо. Гэхдээ надтай л таараагүй болохоор өөр ахмад тоглогчид нэлээд байсан.
-Тэмцээний туршид хэдэн өрөг тоглов?
-Тэмцээний туршид есөн өрөг тоглож, наймд нь ялж, Дэлхийн аварга болсон. Наймдугаар өрөгт тоглохдоо өрсөлдөгчөө цагаар хожоод их баярласан.
-Хамгийн хүчтэй өрсөлдөгч чинь аль улсын тамирчин байсан бэ?
-Аваргын төлөө тоглосон Сингапурын тамирчин хамгийн хүчтэй өрсөлдөгч байлаа. Бид хоёр бараг л тэнцүүхэн тоглож байсан ч сүүлийн нэг нүүдлийг би 1.10 цаг бодож нүүсэн, тэвчээр шалгасан нүүдэл байсан. Өрсөлдөгч талдаа хожих боломжийг 80 хувь өгч байж буулгаж авсан.
-Нэг нүүдлийг 1.10 цаг боож байж нүүсэн гэхээр, ингэхэд нэг тоглолт хэдэн цаг үргэлжилж байв?
-Өдөрт нэг л хүнтэй тоглож байсан. Дээд тал нь таван цаг тоглосон.Энэ удаагийн тэмцээнд оролцсон тамирчид бүгд их хүчтэй, сайн тоглогч байлаа. Өрсөлдөгчөө хожихын тулд бүхий л хувилбарыг бодож, тоглогчоосоо түрүүлж нүүдлээ харахыг хичээж тоглодог болохоор олон цаг бодож, сууж тоглож байгаагаа ч төдийлөн анзаараагүй байх үе байдаг.
-Шатрын спортоор хэдэн жил хичээллэж байж өнөөдрийн амжилтад хүрэв. Ямар клубын тамирчин бэ?
-Шатрын спортоор хичээллээд 9 жил болж байна. Анх долоон настай байхдаа Н.Батболд багшийн удирдлагад “Төр Монгол” клубт харьяалагдан тоглодог байсан. Одоо Ц.Батсайхан багштай “Монгис” клубт харьяалагдан тоглож байна.
-Дэлхийн шинэхэн аварга Г.Мөнхбаярын өмнөх амжилтуудыг уншигчид маань сонирхож байгаа байх?
-Ази, дэлхийн аварга шалгарлуулах тэмцээнүүдэд тогтмол амжилттай оролцож байсан. Өсвөрийн шатарчдын Улсын аваргын хошой алт, нэг мөнгө, хоёр хүрэл медальтай.
-Анхны олон улсын чанартай томоохон тэмцээнд хэдэн настайдаа явж байв?
-10 настай байхдаа Вьетнам улсад болсон тэмцээнд явсан. Тухайн үед санхүүгийн асуудал хүнд байсан болохоор аав маань машинаа зарж, миний зардлыг бүрдүүлж өгсөн ч би амжилт гаргаж чадаагүй. Тиймээс гэр бүлийнхэнийхээ итгэл, найз нөхөд, клубын тамирчид, дасгалжуулагчийнхаа итгэл найдварыг даахын тулд илүү их хичээх ёстойг ухаарсан. Ямар ч хүн хөдөлмөрлөх маш чухал. Тиймээс амжилт гаргая гэж бодож байгаа бол цаг минутыг зүгээр алдаж болохгүй, хичээх хэрэгтэй юм байна гэж ойлгож, их хичээсэн. Тиймээс энэ амжилтад хүрлээ. Сэтгэл зүйгээр байнга дэмжиж байсан аав ээж, дасгалжуулагч багш, сургуулийн удирдлага, хамт олондоо “Маш их баярлалаа. Цаашид илүү их хичээж, амжилтаа бататгаж, итгэлийг тань өргөж явах болно” гэдгээ хэлье.
-Ингэхэд шатар тоглоё, энэ спортыг хөөе гэдэг сэдлийг төрүүлсэн, хөтөлж оруулсан хүн хэн бол гэж уншигчид маань сонирхож байгаа байх?
-Ам бүл зургуулаа. Нэг ахтай, бас дүүтэй. Харин би ихрийн өрөөсөн. Ихэр маань БНХАУ-д сурдаг. Анх ихэртэйгээ шатар тоглодог байсан. Аав маань миний мөнхийн дэмжигч шүү дээ. Бид хоерыг хөтөлж яван дугуйланд оруулж байсан.Бид хоёр долоон жилийн турш хамтдаа байж, шатрын спортоор хичээллэсэн. Дугуйлангаа тараад хоёулаа гэртээ бэлтгэлээ хийчихдэг. Бусад хүүхдүүдийг бодвол бид гэртээ ч, клубтээ чбайнгын бэлтгэлтэй байсан маань өнөөдрийн энэ амжилтын эхлэлийг бий болгосон байх. Ихэр бид хоёр аваа өгөөтэй тэнцүүхэн тоглодог байсан. Магадгүй, ихэр маань сүүлийн хоёр жил шатар тоглоогүй болохоор одоо би арай илүү болсон байж мэдэх юм.Миний хувьд надад боломж илүү байгаа гэж бодсон болохоор ихэртэйгээ хамт БНХАУ-д сурахаас татгалзаж, бэлтгэлээ үргэлжлүүлсэн. Би их хичээсэн. Цаашид ч хичээх болно.
-Шатрыг нэг үгээр илэрхийлбэл?
-Амьдрал. Учир нь шатар тоглож байгаа хүн тэрхүү өрөг дээрээс өөрийнхөө амьдралыг харж, ирээдүйгээ төлөвлөж, тэгээд довтолдог. Ямар ч хүн шууд л үсэрч ороод л хаашаа ч хамаагүй гүйгээд байдэггүй шиг амьдралынхаа төлөө, ирээдүйнхээ төлөө маш болгоомжтой, бас итгэлтэйгээр алхдаг. Нэг үгээр хэлбэл нэг хүү миний амьдралын нэг хэсгийг төлөөлж, тэр хүүгийн нүүдэл, миний амьдралын нэг үеийг харуулна гэж би итгэдэг болохоор нүүдэл болгон хариуцлагатай байдаг. Тоглогч 16 бод, найман хүүгээ хэрхэн зөв удирдахаас тоглолт шалтгаалдаг шиг амьдрал ч бас хүний зөв удирдлага, зөв зан үйлээс шалтгаалдаг гэж боддог. Өөрийнхөө амьдралыг шатар дээрх өрөг дээр орлуулж тооцоолдог болохоор бодит амьдрал маань ч шатрын өрөг дээр үргэлжилдэг гэж хэлж болно.Шатар бол оюун ухааны их спорт. Шатар тоглодог хүн аливаа асуудлыг олон талаас нь харж, тунгаах чадвартай болдог. Мөн ямар ч зүйлд хүлээцтэй хандах чадавхийг суулгаж өгдөг сайхан спорт.