“Хүүхдийн эрх ба хүүхэд хамгаалал” сэдэвт тэмцээнийг Нийслэлийн Баянзүрх дүүргийн Засаг даргын Тамгын газрын Нийгмийн хөгжлийн хэлтэс, Боловсролын хэлтэс, “Дэлхийн Зөн” Олон Улсын байгууллагатай хамтран амжилттай зохион байгууллаа. Уг тэмцээний гол зорилго нь хүүхдийн аливаа хүчирхийллээс урьдчилан сэргийлэх, тэдэнд хүүхэд хамгааллын талаархи мэдлэг олгоход оршжээ.
Тэмцээнд дүүргийн ерөнхий боловсролын “Амгалан” цогцолбор, “Баянзүрх” цогцолбор, 87, 92, 120-р сургуулиудын 7-11 дүгээр ангийн сурагчид оролцсон байна. Сургууль бүрээс шалгарсан дээрх шилдэг таван сургуулийн сурагчид нэг баг болон оюун ухаан, авхаалж самбаагаа сорьсон юм.
Хоёр үе шаттай явагдсан тэмцээний эцсийн шатны шалгаруулалтыг багийн мэндчилгээ, эмблэм, хаяг, багийн ахлагч нарын дундах тэмцээн, асуулт хариулт, “Хүүхдийн эсрэг хүчирхийлэл ба хүүхэд хамгаалал” сэдэвт жүжигчилсэн тоглолт зэрэг төрлөөр явуулсан. Харин дээрх шалгууруудын гүйцэтгэл хэрхэн байгаагаас хамаарч аваргыг шалгаруулжээ.
Тэмцээний тэргүүн байрын эзнээр “Баянзүрх” цогцолбор сургуулийн “Гэрэлт-ирээдүй” баг хүртсэн бол удаах байрыг “Амгалан” цогцолбор сургуулийн “Эх дэлхийн цэцэгс” баг хүртсэн юм. Харин гутгаар байрын эзнээр 87 дугаар сургуулийн “Зөв ирээдүй” баг тодорсон байна.