УИХ-ын Хууль зүйн байнгын хорооны 2013 оны 12 дугаар сарын 25-ны өдрийн 15 тоот тогтоолоор УИХ-аас 2013 онд баталсан Цагдаагийн албаны тухай, Тахарын албаны тухай, Гэрч хохирогчийг хамгаалах тухай, Төлбөрийн чадваргүй яллагдагчид үзүүлэх хууль зүйн туслалцааны тухай хуулиудын хэрэгжилт болон Шүүхийн шинэчлэлийн хүрээнд батлагдсан хуулиудын хэрэгжилттэй танилцах үүрэг бүхий “Ажлын хэсэг”-ийг Хууль зүйн байнгын хорооны дэргэд байгуулсан билээ.
Хууль зүйн байнгын хорооны даргаар ахлуулсан УИХ-ын хурлын гишүүдийн бүрэлдэхүүнтэй тус “Ажлын хэсэг”-ийн гишүүд нь байгууллага бүрт хуваагдан ажиллах бөгөөд ШШГЕГ-ын үйл ажиллагаа, хуулийн хэрэгжилттэй танилцах, Нийслэлийн шийдвэр гүйцэтгэх албаны иргэний болон захиргааны хэргийн шүүхийн шийдвэрийг биелүүлж төр, иргэн, аж ахуйн нэгж байгууллагад учирсан гэм хор, хохирлыг хэрхэн барагдуулж буйтай танилцах болон хяналт, шалгалт хийх үүргийг УИХ-ын гишүүн Б.Чойжилсүрэн, УИХ-ын гишүүн Ц.Оюунбаатар, гишүүн Д.Ганбат нар хэрэгжүүлэхээр болжээ.
Уг “Ажлын хэсэг”- нь 2014 оны 1 дүгээр сарын 13-наас 4 дүгээр сарын 5-ны хооронд ажиллах бөгөөд Хууль зүйн яам, Улсын дээд шүүх, Шүүхийн ерөнхий зөвлөл, Улсын ерөнхий прокурорын үйл ажиллагаатай танилцаж, Хууль зүйн яамны харьяа агентлагуудын үйл ажиллагаатай танилцаж, хяналт шалгалт хийх юм. Ингэхдээ “Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хууль”-ийн хэрэгжилт, Иргэний болон захиргааны хэргийн шүүхийн шийдвэрийг биелүүлж төр, иргэн, аж ахуйн нэгж байгууллагад учирсан гэм хор, хохирлыг хэрхэн барагдуулж байгаа, Иргэний хохирол барагдуулах шүүхийн шийдвэрийн дагуу эд хөрөнгийн албадан дуудлага худалдаа, төлбөр барагдуулалт, иргэдийн эрх, хууль ёсны ашиг сонирхолыг хэрхэн хангаж ажиллаж байгааг шалгах аж.
Түүнчлэн тус “Ажлын хэсэг”-т мэргэжил арга зүйн туслалцаа үзүүлэх болон холбогдох бусад бэлтгэл ажлыг хангах үүрэг бүхий дэд ажлын хэсгийг Хууль зүйн яамны Төрийн нарийн бичгийн дарга, Хууль зүйн яамны Бодлогын хэрэгжилтийг зохицуулах газрын даргаар ахлуулан байгуулсан бөгөөд ШШГЕГ-ын Тогтоол гүйцэтгэх газрын дарга, Шийдвэр гүйцэтгэх газрын дарга нар ажлын хэсгийн бүрэлдэхүүнд ажиллах юм.