Хөгжлийн бэрхшээлтэй иргэдийн эрхийг
хамгаалах олон улсын өдрийг НҮБ-ын гишүүн орнууд 12 сарын 03 өдрийг
тэмдэглэн өнгөрлөө. Монгол улс НҮБ-ын “Хөгжлийн бэрхшээлтэй хүмүүсийн эрхийн
тухай” Конвенцид нэгдэн орсон улс бөгөөд хөгжлийн бэрхшээлтэй хүмүүст хөгжлийн
бэрхшээлээс нь шалтгаалан алагчилалгүйгээр хүний бүх эрх, үндсэн эрх чөлөөг бүрэн дүүрэн эдлүүлэх явдлыг оролцогч улсуудын
нэгэн адил хангаж, хөхүлэн дэмжих үүрэг хүлээдэг.
Хүүхдийн төлөө үндэсний газрын харьяа Олон нийтэд
түшиглэсэн хүүхдийн хөгжил, хамгааллын 5-р төвд хөгжлийн бэрхшээлтэй 160 гаруй
хүүхэд гэр бүлийн хамт үйлчлүүлж байна. Тус төв анх 2005 онд Хүүхдийг Ивээх
сангийн төслийн хүрээнд байгуулагдсан юм. Хөгжлийн бэрхшээлтэй иргэдийн эрхийг
хамгаалах олон улсын өдрийг тус төвөөр үйлчлүүлдэг хүүхдүүд өвлийн өвгөн, цасан
охидын хамт тэмдэглэлээ. Олон нийтэд түшиглэсэн хүүхдийн хөгжил, хамгааллын 5-р
төвд зохион байгуулагдсан өдөрлөгт “Урбан сити” ХХК, UBS ТВ “Номын ертөнц”
нэвтрүүлгийн залуучууд Өвлийн өвгөний номон бэлэг, урлагийн тоглолтоор, Кендама
холбооныхон үзүүлэх тоглолт, Ямаха хөгжмийн төвийнхөн төгөлдөр хуур хөгжмийн
хичээлээр бэлэг барьлаа. ХТҮГ-аас хүүхдүүдэд 30ш кендама тоглоомыг бэлэглэсэн
юм. Хүүхдүүд эцэг, эхтэйгээ шүлгийг СГЗ Ү.Хүрэлбаатар хөгжмийг УГЗ Б.Батчулуун
/Никитон хамтлаг/ зохиосон “Хүүхэд буруугүй” шинэ дууны клипыг үзэн, дуулж,
бүжиглэн нэг өдрийг хамтдаа өнгөрүүлсэндээ сэтгэл хангалуун байлаа.
Шүлгийг СГЗ Ү. Хүрэлбаатар
Хөгжмийг УГЗ Б. Батчулуун /Никитон хамтлаг/
ХҮҮХЭД БУРУУГҮЙ
Алтан наран бүхнийг гэрэлтүүлдэг байхад
Амьдрал чи юунд алаг үрсийг ялгана вэ
Хүүхдийн царайнд гэгээ татаж
Жаргал гэрэлтэхийг бид хүснэ
Аав ээжийн хайраар хүүхэд дутаж болохгүй
Ариун цагаан сэтгэлд нь буртаг тусах учиргүй
Алаг үрсээ бид л хайрлахгүй юм бол
Алтан дэлхийд тэднийг хэн хайрлах юм бэ
Дх:Хүүхдүүдээ хайрлацгаая хүмүүс ээ
ойлгоцгооё бүгдээрээ
Хүүхдүүдэд минь ямар ч буруу байхгүй
ямар буруу байхав дээ
Өнчин нулимс хүүхдийн нүдэнд бүү үзэгд
Өвчин шаналан тэднийг минь бүү шаналга
Чамд учирсан зовлон жаргалыг
Хамтдаа туулахыг би хүснэ
Төр түмний хайраар хүүхэд дутаж болохгүй
Төгөлдөр их заяанд нь тортог тусах учиргүй
Үр хүүхдээ бид л хайрлахгүй юм бол
Өргөн дэлхийд тэднийг хэн хайрлах юм бэ
Дх:Хүүхдүүдээ хайрлацгаая хүмүүс ээ
ойлгоцгооё бүгдээрээ
Хүүхдүүдэд минь ямар ч буруу байхгүй
ямар буруу байхав дээ
Хацрыг минь дагаж нулимс урсаж байна
Харцанд минь гунигийн манан хурж байна
Хорвоод хүн болж мэндэлсэн нь бидний буруу юу
Хоосон баяны ялгаанд амьдрах нь бидний заяа юу
Хүүхэд бидэнд буруу байхгүй
Хүүхэд бидэнд буруу байхгүй
Алив ээж ааваа хэлээд аль
Хүүхэд бидэнд буруу байна уу
Дх:Хүүхдүүдээ хайрлацгаая хүмүүс ээ
ойлгоцгооё бүгдээрээ
Хүүхдүүдэд минь ямар ч буруу байхгүй
ямар буруу байхав дээ