Гадаадын иргэн, харьяатын асуудал эрхлэх газар иргэдэд үзүүлж буй төрийн
үйлчилгээг боловсронгуй, шуурхай хүргэх ажлын хүрээнд энэ оноос
Буянт-Ухаа, Дорноговь аймгийн Замын-Үүд, Сэлэнгэ аймгийн Сүхбаатар,
Алтанбулаг боомт дээр нэг удаагийн виз, Өмнөговь аймгийн Гашуунсухайт,
Шивээхүрэн боомт дээр орох виз, олон удаагийн визийг шуурхай олгож
эхлээд байгаа билээ. Тус Газрын дарга Б.Пүрэвдорж 11 дүгээр сарын
18-19-ний өдрүүдэд дээрх ажлын хэрэгжилт, үр дүнтэй танилцахаар
Өмнөговь аймгийн Гашуунсухайт боомтод ажиллалаа.
Энэ үеэр
Газрын дарга Б.Пүрэвдорж Гашуунсухайт боомтын дарга, Гаалийн газрын
дарга, Хилийн мэргэжлийн хяналтын хэлтсийн ахлах байцаагч, нүүрс тээвэр
эрхэлж байгаа аж ахуйн нэгжийн төлөөлөлтэй уулзан, боомт дээр олгож
буй орох виз, олон удаагийн визийн үйлчилгээний талаар санал солилцов.
Үйлчлүүлэгчид
орох виз авч Гашуунсухайт, Шивээхүрэн боомтоор орж ирсэн тохиолдолд хил
дээр хурууны хээг авч, түр ирэгчийн бүртгэл хийж эхэлжээ. Мөн Хөдөлмөр
эрхлэлт үйлчилгээний төвөөс холбогдох зөвшөөрлөө авч Гадаадын иргэн,
харьяатын асуудал эрхлэх газарт оршин суух зөвшөөрлийн хүсэлт, олон
удаагийн визийн материалтай хамт өгсөн тохиолдолд эхний ээлжинд олон
удаагийн визийг Өмнөговь аймгийн боомтууд дээр шуурхай шийдвэрлэн олгож,
картыг ажлын тав хоногийн дотор гарган өгч байгаа аж.
Манай байгууллага төвд төвлөрсөн эрх мэдэл буюу зөвхөн дарга нар асуудлыг шийддэг тогтолцоог халж, орон нутаг дахь албадын дарга, мэргэжилтнүүдэд шийдвэр гаргах эрх өгснөөр албан хаагчдыг илүү хариуцлагажуулах, иргэдэд төрийн үйлчилгээг шуурхай хүргэх боломж бүрдлээ. Ийм боломж бий болгохын тулд ажлын хэсэг байгуулан Газрын хэмжээнд 2001 оноос хойш батлагдсан 138 журам, заавар, хэм хэмжээ тогтоосон тушаалуудад дүн шинжилгээ хийж, эрх зүйн үндэслэлгүй, үйлчлэл нь дуусгавар болсон, мөрдөх шаардлагагүй 44 тушаалыг хүчингүй болгосон. Үүний үр дүнд гадаадын иргэд тухайн хилийн боомт дээр виз, оршин суух зөвшөөрөл авах, хурууны хээ өгөх боломжтой боллоо. Мөн ирэх оны нэгдүгээр сарын 1-нээс Хилийн боомтын тухай хууль хэрэгжиж, Хил хамгаалах байгууллагын шалган нэвтрүүлэх албаны чиг үүрэг манай байгууллагад шилжсэнээр нүүрс тээврийн үйлчилгээнд явж байгаа жолооч нар хурууны хээгээр хил нэвтэрдэг болно.
Манай алба эдүгээ 14 албан хаагчийн орон тоотойгоор Гашуунсухайт, Шивээхүрэн боомтыг хариуцан ажиллаж байна. Энэ оны 11 дүгээр сарын 18-ны өдрийн байдлаар гадаадын 347 иргэнд визийн шилжүүлэг хийж, 82 иргэнд орох виз, таван иргэнд гарах, орох визийг олгоод байна. Мөн виз, бүртгэл, оршин суух зөвшөөрөл, Хөдөлмөр эрхлэх журам зөрчсөн 11 аж ахуйн нэгж, байгууллага, 145 гадаадын иргэнд Гадаадын иргэний эрх зүйн байдлын тухай хуулийн дагуу захиргааны арга хэмжээ авч эдгээрээс 40 иргэнийг албадан гаргалаа. Гашуунсухайт, Шивээхүрэн боомтуудад виз олгож эхэлснээр иргэд, аж ахуйн нэгж, байгууллагууд Улаанбаатар явж цаг алдахгүй, төрийн үйлчилгээг шуурхай хүргэх боломж бүрдлээ.
Урьд нь нүүрс тээвэр эрхэлдэг жолооч нар БНХАУ-ын Бээжин, Хөх хотын консулаас виз авч, Улаанбаатар хотод очиж хурууны хээгээ өгч, оршин суух бүртгэл хийлгэдэг. Үүний дараа Хөдөлмөр эрхлэлтийн үйлчилгээний төвөөс зөвшөөрөл гартал 21 хоног хүлээдэг байсан бол эдгээр үйлчилгээг тухайн боомтоос авдаг болсон нь бидний цаг зав, зардлыг хэмнэсэн төр засгаас үзүүлж буй хамгийн том дэмжлэг гэж үзэж байна.