Хүүхдийн эрхийн тухай Конвенцийг НҮБ-ын Ерөнхий Ассамблей 1989 оны 11 дүгээр сарын 20-нд баталснаас хойш 193 орон нэгдэн орсон бөгөөд хүн төрөлхтөний түүхэн дэх хамгийн олон улс орон баталсан хүний эрхийн хэлэлцээр болсон. Монгол улс 1990 онд ХЭК-д нэгдэн орсоноосоо хойш 4 удаа ХЭК-ийн хэрэгжилтийн талаар үндэсний тайлан илтгэлийг НҮБ-ын Хүүхдийн эрхийн хороонд явуулсан. Тус хорооноос 1996, 2005, 2010 онд зөвлөмж ирүүлсэн байна. Монгол улс тав дахь тайлан илтгэлээ 2014 оны 10 дугаар сарын 20 өдөр НҮБ-ын Хүүхдийн эрхийн хороонд өргөн барих үүрэгтэй бөгөөд Хүүхдийн Эрхийн Конвенцийн нэмэлт протоколуудын хэрэгжилтийн талаарх мэдээллийг хамт багтаасан байх ёстой юм. Энэ жил НҮБ-ын Хүүхдийн сангаас Конвенцид нэгдэн орсон улс орны хүүхдүүдийн эрхийн төлөв байдалд хийсэн судалгаан дээр үндэслэн “Хүүхдийн эсрэг бүх төрлийн хүчирхийллийг таслан зогсоое” дэлхийн санаачлагыг өрнүүлж байна. Хүчирхийлэл нь зөвхөн нэг хүүхэд, нэг л гэр бүлийн асуудал биш бөгөөд үүнд нийгэм тэр чигээрээ өртөж байдаг. Хүчирхийлэлд өртсөн хүүхэд хөгжлийн бэрхшээлтэй,амьдралын баяр баясгалангүй, итгэлгүй болж, өөрөө хүчирхийлэгч болох магадлал өндөр байдаг ба улмаар нийгмийн баялгыг бүтээгч бус, улс орны хөгжлөөс хойш татдаг иргэд бий болсоноор үйлдвэрлэл буурах төдийгүй эдийн засагт ч сөргөөр нөлөөлдөг. 2006 оноос хойш НҮБ-ын Хүүхдийн сангаас явуулсан судалгаагаар жил бүр 133 саяаас 275 сая хүүхэд эцэг эхийнхээ харгис, хатуу зан авирын гэрч болдог болох нь тогтоогджээ. НҮБ-ын Хүүхдийн сангаас 2013 оны 7 сарын 23-ны өдөр “Хүүхдийн эсрэг бүх төрлийн хүчирхийллийг таслан зогсооё” сэдэвт Дэлхийн санаачлагыг сайн үйлсийн элч Лиам Нээсоны маш хүчтэй уриалгатайгаар эхлүүлээд байна. Уг санаачлага нь хүчирхийллийн нуугдмал, далд байдлыг ил болгож, хор хөнөөлийг таниулах, хүчирхийллийн золиос болж буй дэлхий олон сая хүүхдэд туслах нэгдмэл үйл ажиллагааг олон нийтийн оролцоон дээр тулгуурлан зохион байгуулж, бодитой үр дүн бий болгохыг зорьж буй билээ. Дэлхийн улс орнууд энэхүү санаачлагыг дэмжин өөрийн оронд хүүхдийн эсрэг бүх төрлийн хүчирхийллийг таслан зогсоохын тулд нөөц боломжоо ашиглан хамтран ажиллах юм.
ХАХНХЯ, ХТҮГ, НҮБ-ын Хүүхдийн сангийн Монгол дах Суурин төлөөлөгчийн газар хамтран 11 дүгээр сарын 20-ны өдөр Монголын Хүүхдийн ордонд зохион байгуулсан “Хүүхдийн эсрэг бүх төрлийн хүчирхийллийг таслан зогсоое” дэлхийн санаачлагад нэгдэх үйл ажиллагаанд, ТББ-ууд, мэргэжлийн фото студи, урлагийнхан, хүүхдүүд, багш нар, эцэг эхчүүд, олон нийтийн төлөөлөл 1000 гаруй хүн оролцлоо. Тус арга хэмжээний хүрээнд аяыг Урлагын гавьяат зүтгэлтэн Б. Батчулуун /Никитон хамтлагын дуучин/, шүлгийг яруу найрагч Ү. Хүрэлбаатар нарын зохиосон “Хүүхэд буруугүй” шинэ дууны нээлт болж, клип, уран бүтээлчдийн мэндчилгээг олон нийт, хүүхдүүд нижигнэсэн алга ташилтаар талархан хүлээж авлаа. Монгол улсад 1 жилийн турш дэлхийн санаачлагатай холбоотой үйл ажиллагаанууд зохион байгуулагдах болно.