Сүхбаатар дүүргийн ЗДТГ, “Дэлхийн Зөн Монгол” олон улсын байгууллагатай хамтран жил бүр уламжлал болгон энэхүү наадмыг зохион байгуулдаг. Энэ удаагийн наадмыг цэцэрлэгийн 4, сургуулийн 6 төрлөөр 2013 оны энэ сарын 9-нөөс 24-ний хооронд 2 үе шаттайгаар явуулж байна.
Монгол улсын хэмжээнд хэрэгжиж байгаа үндэсний болон дэд хөтөлбөрийн хэрэгжилтийг хангах, ирээдүйн авъяастныг тодруулах, дуу хөгжмийн багш нарын мэдлэг, ур чадварыг сайжруулж, өсвөр үеийн урлагийн боловсролыг дээшлүүлэх зорилгоор зохион байгуулж байгаа билээ. Наадмын анхан шатны шалгаруулалтыг сургууль, цэцэрлэгүүд дээрээ 10 дугаар сарын 09-ний дотор явуулж, дүүргийн шалгаруулалтанд оролцох хүүхдүүдээ тодруулсан.
Наадмыг 2 насны ангиллаар 21 цэцэрлэг, 19 сургуулийн 2250 гаруй хүүхэд багачууд, тэдгээрийн эцэг эх, багш нарын төлөөлөл оролцож шилдгүүдээ тодрууллаа. Тэмцээний шүүгчээр Сүхбаатар дүүргийн Нийгмийн хөгжлийн хэлтсийн Соёл урлаг, ТББ хариуцсан мэргэжилтэн Ж.Ууганцэцэг, МУГЖ, бүжиг дэглээч Ч.Долгормаа, Хөгжмийн зохиолч СТА, Батлан хамгаалах их сургуулийн багш, удирдаач Ч.Гонгормаа нар ажиллалаа. Уг наадмын шилдгүүдийн нэгдсэн тоглолт, шагнал гардуулах ёслол 2013 оны 10 дугаар 24-ний 11.00 цагт Монголын хүүхдийн ордонд зохион байгуулагдах юм.