Нийслэлийн Засаг дарга “Төр, хувийн хэвшлийн хамтын ажиллагааг нэмэгдүүлж, хотынхоо хөгжилд өөрсдийн хувь нэмрээ оруулах”-ыг нийслэлд үйл ажиллагаа явуулдаг аж ахуйн нэгжүүдэд уриалсан. Энэ уриалга, санаачлагын дагуу хувийн хэвшлийн байгууллагууд Улаанбаатар хотын Захирагчийн ажлын алба, нийслэлийн Ерөнхий төлөвлөгөөний газар, Хөрөнгө оруулалтын газартай хамтран өөрсдийн хөрөнгөөр хотын гудамж, талбайг тохижуулах ажил эхэлжээ. Энэ ажлын эхлэл болж “Оюу толгой” ХХК Сүхбаатар дүүргийн 8 дугаар хорооны нутаг дэвсгэрт байрлах “Оюутны гудамж”-ийг /Монгол Улсын Боловсролын Их сургуулийн уулзвараас Спортын төв ордны баруун хойд уулзвар хүртэл/ тохижуулан явган хүний зам, ногоон байгууламж, бусад тохижилтыг иж бүрнээр нь шинэчиллээ. Нийслэлийн Ерөнхий төлөвлөгөөнийн газраас гаргасан зургийн даалгаврыг үндэслэн “Идеаль” группийн зураг төслийн дагуу гүйцэтгэсэн энэ ажилд нь нийт 500 орчим сая төгрөг зарцуулсан бөгөөд нийт 310м талбайд уран баримал, “Төрийн дуулал”-д зориулсан хөшөө, явган болон замын гэрэлтүүлэг, модны гэрлэн чимэглэл, хогийн сав сандал бусад тохижилтын ажлуудыг цогцоор нь хийжээ. Мөн тус гудамжинд өндөр хурдны Wi-Fi төхөөрөмж суурилуулсан байна.
Тус гудамжийг өчигдөр 20:00 цагт албан ёсоор нээсэн бөгөөд нийслэлийн Засаг дарга бөгөөд Улаанбаатар хотын Захирагч Э.Бат-Үүл, Сүхбаатар дүүргийн Засаг даргын орлогч Л.Амарзаяа зэрэг албаны хүмүүс оролцлоо.