ХБНГУ-д үйл ажиллагаа явуулж байгаа монголчуудын ТББ-уудын анхны уулзалтыг Монгол Улсаас ХБНГУ-д суугаа ЭСЯ, Герман дахь Монгол академчидийн холбоотой хамтран энэ сарын 11-12-нд Берлин хотноо амжилттай зохион байгуулав.
Элчин сайд Б.Даваадорж арга хэмжээг нээж үг хэлэхдээ, хоёр орны харилцаа хамтын ажиллагааг хөгжүүлэхэд иргэд, ТББ-уудын оролцоо онцгой чухал үүрэг гүйцэтгэж ирсэн ба цаашид ч гүйцэтгэхийг онцолж, хуралд оролцож буй төлөөлөгчдөд ХБНГУ дахь монгол ТББ-уудын нэгдсэн сүлжээ үүсгэн байгуулах ажилд нь амжилт хүсч, ЭСЯ цаашид ч үргэлжлүүлэн дэмжиж ажиллахаа мэдэгдэв.
Энэхүү арга хэмжээнд Берлин, Штуттгарт, Мюнхен, Нюрнберг, Хамбург, Бонн, Дюссэлдорф, Дрезден, Фрайберг, Аахен, Дармштадт болон Шлангенбад хотуудаас “Герман дахь Монгол академчидийн холбоо”, “Майдар”, “Фройндэ дер Монголай”, “Дойч-монголишэс тор НРВ”, “Фөрдерфэрайн Улаанбаатар”, “Монгол-германы эдийн засгийн клуб”, “Цог клуб”, “Дойч-монголишэс културфэрайн”, “Шансэн дурх лэрнэн”, “Дэлхийн цэцэрлэг Заамар”, “Хөх тэнгэр”, “Хаан мэдикал эйд”, “ФХБ”, “ФМСФ” зэрэг нийт 21 ТББ-ууд болон Солонго сургууль, Од сургууль, Эрдэм сургууль, “Монголай цэтнрум Бонн” төв, Аахен дахь монгол оюутнуудын холбоо, Фрайберг дахь монгол оюутнуудын холбоо, “Урбан номадс” төсөл, “Монголай Штаммтиш Хамбург” зэрэг сайн дурын байгууллагуудын нийт 80 гаруй төлөөлөгчид хүрэлцэн ирсэн байв.
Уулзалтын үеэр ТББ-ууд үйл ажиллагаагаа дэлгэрэнгүй танилцуулж өөрсдийн туршлагаасаа хуваалцав. Түүнчлэн мэдээлэл солилцох нэгдсэн сүлжээ үүсгэн байгуулах, ТББ-ууд хоорондын хамтын ажиллагааг зохицуулах, хөгжлийн ажиллагаа болон герман дахь монгол сургуулийн үйл ажиллагааны тухай асуудлаар ажлын хэсгүүдэд тус тус хэлэлцэж “Герман дахь монгол ТББ-уудын нэгдсэн зөвлөл” үүсгэн байгуулав. ТББ-уудын оролцоо бүхий тус зөвлөл нь герман дахь монгол ТББ-уудын нэгдсэн сүлжээг зохицуулах зорилготой бөгөөд Монгол Улсаас ХБНГУ-д суугаа Онц бөгөөд Бүрэн эрхт Элчин сайдын ивээл доор ажиллах юм. Зөвлөлийг гишүүн ТББ-ууд хагас жилийн ээлжлэн даргалж, үйл ажиллагаагаа тогтмолжуулахаар тохиролцов.
Герман дахь монголчуудын ТББ-уудын уулзалтад Улаанбаатар хотоос “Монгол-Германы Гүүр” ТББ, Герман-монголын бизнес эрхлэгчдийн холбооны төлөөлөгчид болон Холбооны Эдийн засгийн хамтын ажиллагаа, хөгжлийн яамны Олон улсын шилжих хөдөлгөөний төв болон Германы олон улсын хамтын ажиллагааны нийгэмлэгийн төлөөлөгчид хүрэлцэн ирж дэмжлэг үзүүлэв.