Баянзүрх дүүргийн Засаг даргын Тамгын газрын Санхүү, төрийн сангийн хэлтсээс дүүргийнхээ нутаг дэвсгэрт үйл ажиллагаа явуулдаг аж ахуйн нэгж, байгууллага, иргэдийг 2013 оны гуравдугаар улирлын тайлан тэнцлээ энэ сарын 20-нд багтааж ирүүлэхийг уриалав. Учир нь иргэд, аж ахуйн нэгж, байгууллагууд санхүүгийн тайлангаа сарын сүүлийн өдрүүдэд багтааж өгөхөд болно хэмээдгээс үүдэж хиймэл ачаалал үүсч, чирэгдэл бий болдог байна.
Тиймээс улирал бүрийн сүүлийн сарын сүүлчийн өдрүүдэд үүсдэг хиймэл ачааллыг багасгахадиргэд, аж ахуйн нэгж, байгууллагууд дүүргийн Тамгын газар заавал өөрийн биеэр ирэхгүйгээр http://www.e-balance.gov.mn/сайт руу нэвтэрч тайлангаа шивж, батлагдсан маягтын дагуу шуудангаар явуулах нь цаг хэмнэсэн зөв ажил болох гэнэ. Түүнчлэн шуудангаар явуулж байгаа тайлан тэнцлийн хүлээн авах хаягийг Баянзүрх дүүргийн Засаг даргын Тамгын газрын Санхүү, төрийн сангийн хэлтэс гэж хаяглаад буцах хаягаа, шинэ дугтуйн хамт ирүүлэх шаардлагатай юм байна. Учир нь дүүргийн Тамгын газрын Санхүү төрийн санд бүртгэсэн тайлан тэнцлийг тухайн хаягаар эргүүлж явуулах учраас буцах хаяг нь тодорхой байх ёстой аж.
Дашрамд дурдахад, Тайлангийн хугацаа хоцроосон тохиолдолд Нягтлан бодох бүртгэлийн тухайн хуулийн 23.1.3-т заасны дагуу “Аж ахуйн нэгж, байгууллага улирлын санхүүгийн тайланг дараа улирлын эхний сарын 20, жилийн санхүүгийн тайланг дараа оны хоёрдугаар сарын 10-ны өдрийн дотор харилцагч санхүүгийн байгууллагад тушаагаагүй албан тушаалтныг хөдөлмөрийн хөлсний доод хэмжээг тав дахин нэмэгдүүлсэнтэй тэнцэх хэмжээний төгрөгөөр торгох” арга хэмжээ гэсэн заалттай аж. Харин одоо мөрдөгдөж байгаа хөдөлмөрийн хөлсний доод хэмжээгээр тооцоход тайлан тэнцлийн баталгаажуулалтаа хоцроосны торгуулийн хэмжээ 960.000 төгрөг юм байна гэж Баянзүрх дүүргийн Хэвлэлийн албанаас мэдээлэв.