Шүүхийн шийдвэр гүйцэтгэх ерөнхий газраас албан хаагчдынхаа нийгмийн асуудлыг шийдвэрлэх, ажлын байрны ая тухтай нөхцлийг бүрдүүлэхэд онцгой анхраарч, цалингийн шатлалыг өсгөж, албаны контор, орон сууц барих, албан ажилд шаардлагатай техник хэрэгсэлийн хангалтыг сайжруулах зэрэг арга хэмжээг үе шаттайгаар хэрэгжүүлэн ажиллаж байна. Эдгээр ажлуудын хүрээнд Төв аймгийн Лүн сумын нутагт байрлах Авдрантын хорих анги буюу хорих 403 дугаар ангийн албан хаагчдын 8 айлын орон сууцыг ашиглалтанд орууллаа. Тус орон сууцны түлхүүр гардуулах ёслолын ажиллагаа 10 дугаар сарын 2-ны өдөр боллоо. Албан хаагчдыг ажиллуулахад ажиллах орчин нөхцөл чухал байдаг. Ялангуяа Улаанбаатар хотоос алслагдсан газар ажиллаж, амьдарч байгаа албан хаагчдад тулгарах хүндрэл бэрхшээлүүд цөөнгүй байдаг. Ийнхүү тус ангийн албан хаагчдын нийгмийн асуудлыг шийдвэрлэсэнээр тэдний ажиллах итгэл үнэмшил, урам зориг нэмэгдэх юм. Хорих 403 дугаар анги нь нийт бие бүрэлдэхүүний сахилга хариуцлагыг дээшлүүлэх, иргэдэд үзүүлэх төрийн үйлчилгээний чанар шуурхай байдлыг сайжруулах, үйлдвэрлэлийн үйл ажиллагааг өргөжүүлж, хүмүүжигчдийг ажлын байраар хангах, төлбөр төлөлтийг нэмэгдүүлэх, ял эдлэгсэдийн болон албан хаагчдын амьдрах ахуй орчныг сайжруулахад анхааран байна. Тухайлбал албан хаагчдын амьдрах орчин нөхцөлийг сайжруулах зорилгоор 238 м2 талбайтай соёлын төвийн заалыг 6 айлын орон сууц болгон өөрчилж, иж бүрэн засварлан өнгөрсөн 08 дугаар сарын 19-ний өдөр ашиглалтанд оруулжээ. Мөн хүмүүжигчдийн амьдралын 3 дугаар бүсэд байрлах байр нь эрүүл ахуйн шаардлага хангахгүй болсон тул хүмүүжигчдийн амьдрах орчин нөхцөлийг сайжруулах зорилгоор иж бүрэн засвар хийж, ариун цэврийн өрөөг шинээр хийж ашиглалтанд оруулснаар хүмүүжигчид эрүүл ахуйн шаардлага хангасан тохитой дулаахан байранд амьдарч байна. Түүнчлэн 2013 оны эхний 9 сарын байдлаар давхардсан тоогоор нийт 639 хүмүүжигчийг ажлын байраар хангаж 44540,3 мянган төгрөгийн цалин бодож, бусдад учруулсан гэм хорын хохиролд 9767,4 мянган төгрөг шилжүүлж, 25138,1 мянган төгрөгийг хүмүүжигчдийн нэрийн дансанд байршуулсан байна.