Дэлхийн банкны санхүүжилтээр 2009 оны 6 дугаар сараас 2013 оны 6 дугаар сарын 30-ны өдөр хүртэл хэрэгжсэн “Хууль зүйн салбарын үйлчилгээг сайжруулах төсөл” амжилттай хэрэгжээд дууслаа. Энэ төслийн нэг бүрэлдэхүүн хэсэг нь Шүүхийн шийдвэр гүйцэтгэх байгууллагын ажиллах нөхцөл бололцоог дээшлүүлэх ажил байсан бөгөөд энэ ажлын хүрээнд Увс, Булган аймгуудын ШШГА-ны болон Замын-Үүдийн ШШГХ-ийн албан конторын барилгуудыг ашиглалтанд оруулах, ШШГЕГ-ын харьяа 27 байгууллагыг өндөр хурдны мэдээлэл солилцох нэгдсэн сүлжээнд холбох, Шийдвэр гүйцэтгэх ажиллагааны бүртгэл, хяналтын системийг боловсруулан суурилуулах, сургалтын танхимыг орчин үеийн тоног төхөөрөмжөөр тоноглох зэрэгт нийт 2,4 тэрбум төгрөгний хөрөнгө оруулалтыг Дэлхийн банкны санхүүжилтээр хийсэн билээ.
Эдгээр ажлуудыг удирдаж оролцсон төслийн удирдагч, Дэлхийн банкны тэргүүлэх зөвлөх хатагтай Хайке Грамкоу 2013 оны 9-р сарын 27- ноос 2013 оны 10-р сарын 03-ны өдрүүдэд Шүүхийн ерөнхий зөвлөл болон Шүүхийн шийдвэр гүйцэтгэх газрын удирдлагуудтай төслийн үр дүнгийн талаар санал бодлоо солилцон хэрэгжүүлсэн төсөлтэйгээ биечлэн танилцлаа.
Шүүхийн шийдвэр гүйцэтгэх ерөнхий газартай хамтран тус төслийг амжилттай хэрэгжүүлснийг нь үнэлж байгууллагын удирдлагын зүгээс ШШГБайгууллагын “Хүндэт” тэмдгээр шагнасныг гардуулан өгөв.