Гэр хорооллын дахин төлөвлөлт төслийн хүрээнд нийслэлийн Баянзүрх дүүргийн 8, 16 дугаар хороодод дахин төлөвлөлтийн ажил хийгдэж эхлээд байна. Одоогоор 8 дугаар хороонд хэрэгжиж буй “Гангар инвест ” ХХК-ний “Шинэ Амгалан” орон сууцны хороолол нь БХИС-ийн урд талд 39 га-д 5500 айлын 12 давхар 3 блок барилгын суурийн ажлыг эхлүүлээд байгаа юм.
Тус компаний ажлын явц бусад компаниудаасаа сайн явж байгаа аж. Мөн эхний блокийн суурийн бэхжүүлэлтийг хийж, 2 , 3 дугаар блокийн хөрсний хуулалт дуусч байгаа юм байна. Харин цаг агаарын байдлаас шалтгаалан ирэх сарын дунд үе хүртэл ажиллах төлөвлөгөөтэй байгаа гэнэ.
Өнөөдрийн байдлаар 8,16 дугаар хороодод “Баганат Өргөө” ХХК нь БХИС-ийн зүүн талд 30,3 га газарт “Баганат хороолол” төсөл хэрэгжүүлэх бөгөөд 200 айлын газар дээр 4763 айлын 81 блок орон сууцыг нийгмийн байгууламжийн хамтаар 5-7 жилийн дотор барих төлөвлөгөөтэй ажиллаж байна. Эхний ээлжийн таван барилгыг ирэх оны 3 дугаар улиралд ашиглалтад оруулахаар төлөвлөж, 40-өөд айлыг нүүлгэн 40,41 дүгээр байрны суурийн хөрс хуулалтын ажлыг хийх ажээ.
“Гэр хорооллыг барилгажуулах төсөл”-д 19 дүгээр хорооны ашиглалтын шаардлага хангахгүй болсон СОТ-ийн 10 дугаар байр, ХААИС-ийн 3 дугаар байрны иргэд хамрагдах хүсэлтэй байгаа аж. Иймд Нийслэлийн Баянзүрх дүүргийн Засаг даргын Тамгын газрын Эдийн засаг төлөвлөлтийн хэлтсийн болон холбогдох албаны мэргэжилтнууд хуучирч муудсан дээрх барилгуудтай танилцаад иргэдийн хүсэлтийг Нийслэлийн ерөнхий төлөвлөгөөний газарт танилцуулахаар болжээ.
Харин 12-р хороонд төсөл хэрэгжүүлэх “Грандлайн” ХХК нь геологийн зураглалаа хийлгэж дуусчээ. 19 өрхийг нүүлгэхэд бэлэн байгаа бөгөөд дулааны шугам, дэд бүтцийн болон аж ахуйн хашааны талаар шийд гараагүй зэргээс шалтгаалан барилгын ажил эхлээгүй байгаа юм байна. Түүнчлэн 14 дүгээр хороонд шаваа тавьсан “Бүрд констракшин” компанийн “Байгаль” хорооллын ажил мөн эхлээгүй байгаа юм.