Засгийн газрын хэрэгжүүлэгч агентлаг Хүүхдийн төлөө үндэсний газрын дарга И.Нарантуяа НҮБ-ын Хүүхдийн сангийн суурин төлөөлөгч Мохамед Малик Фолл болон холбогдох төлөөлөгчдийг хүлээн авч уулзан цаашдын хамтын ажиллагааны талаар санал солилцсон юм.
Уулзалтын үеэр НҮБ-ын Хүүхдийн сангийн суурин төлөөлөгч Мохамед Малик Фолл Монгол улсын Ерөнхийлөгчийн сонгуульд нэр дэвшигчид “Бид оролцьё, хөгжье” хүүхдийн үндэсний чуулганаас гарсан уриалгыг дэмжин гарын үсэг зурсан нь хүүхдийн эрхийн асуудлыг өндөр түвшинд авч үзсэн явдал болсоныг дурьдаад, тухайн улс оронд хэрэгжиж буй хөтөлбөрийн хүрээнд хүүхэд, эмэгтэйчүүдийн нөхцөл байдлын судалгааг тодорхой хугацаанд хамтран хийж байх ач холбогдолын талаар ярилцлаа. Ялангуяа уул уурхайн хөгжил хүүхдийн аж байдалд хэрхэн нөлөөлж байгаа, хүүхдийн хөдөлмөр эрхлэлтийн асуудлаар бодлогын чанартай ажлууд хийгдэж байгаа ч уул уурхай болон бусад салбарт хөдөлмөр эрхэлсээр байгаа нь нийгмийн тулгамдсан асуудал болж байгааг онцолсон байна.
Уулзалтын үр дүнд хамтарсан ажлын хэсэг Өвөрхангай, Дундговь, Өмнөговь аймагт уул уурхайд ажиллаж буй гэр бүл, хөдөлмөр эрхэлж буй хүүхдүүдийн нөхцөл байдалтай газар дээр нь очиж танилцан, Уул уурхайн сайдын 2013 оны 177 дугаар тушаалаар 11-р сард “Уул уурхай ба хүүхдийн эрх” Олон улсын зөвлөлдөх уулзалт зохион байгуулах ажлын хэсгийн бүрэлдхүүнийг батлуулан ажиллаж байна.
Ажлын хэсгийн бүрэлдхүүнд УУЯ, БШУЯ, ХАХНХЯ, ХТҮГ, НҮБ-ын Хүүхдийн сан, Японы Хүүхдийг Ивээх сан, Дэлхийн Зөн Монгол ОУБ-ыг төлөөлөл орсон.
Тус ажлын хэсэг анхны хуралдаанаа хийж, уул уурхайн хөгжлийн хүүхдэд үзүүлж буй шууд ба шууд бус нөлөөлөл, орон нутгийн уул уурхайд ажиллаж байгаа хүмүүсийн эрүүл мэнд, ар гэрийн амьдрал, хүүхэд хүүхдээ өсгөж байгаа байдал, гар аргаар хөдөлмөр эрхэлж байгаа хүмүүсийн санал хүсэлтийн талаарх мэдээлэлтэй танилцан, зөвлөлдөх уулзалтын бэлтгэлийг ханган ажиллаж байна гэж Хүүхдийн төлөө үндэсний газрын Олон нийттэй харилцах хэлтэсээс мэдээллээ.