Барилгын материалын үйлдвэрүүдийг дэмжих эргэлтийн хөрөнгийн зээлийн үр дүн болон Тэлмэн орон сууцны хорооллын барилгын ажлын явц байдал, тус дүүргийн цэвэрлэх байгууламжийн үйл ажиллагаа зэрэг ажлуудтай газар дээр нь танилцахаар Барилга, хот байгуулалтын сайд Ц.Баярсайхан Налайх дүүрэгт ажиллалаа.
Дотооддоо үйлдвэрлэсэн барилгын материалыг ашиглавал орон сууцны үнэ нэг сая-аас хэтрэхгүй байх боломжтой. Хямд чанартай 760 айлын орон сууцыг Налайх дүүрэгт барихаар Тэлмэн констракшн компани барилгын ажлаа эхлүүлээд байна. Орон сууцны үнийг 990 мянган төгрөгөөр борлуулна гэдгээ сайдад хэлэв. Ингэхдээ сургууль, цэцэрлэг гээд нийгмийн барилга байгууламжийг хамтад нь барих бололцоотой гэлээ. Харин халуун, хүйтэн ус, дулаан авах асуудлаар салбарын яаманд хүсэлт гаргаж байна.
Хотын бодлогын хүрэнд барилгын үйлдвэрлэлийн бүсийг Налайх дүүрэгт бий болгож иргэдийг ажилтай орлоготой болох зорилт дэвшүүлсэн. Хөгжил хотын төвд бус зах руу Баянхошуу, Долоон буудалд дэд төвүүд байрлаж үйлчилгээг төрөлжүүлэн захын дүүргүүдийг хөгжүүлэх юм.
Үүний эхлэл Налайх дүүрэгт тавигдаж энэ ондоо 300 айл орон сууцтай болох юм. Тус дүүрэгт барилгын материалын үйлдвэрүүд нээгдсэнээр гол нэр төрлийн материалаа дүүргийн нутаг дэвсгэрээс татна. Тухайлбал Тэлмэн хорооллын тоосгыг Гүрэн компани 100 хувь нийлүүлж байна. Дээр нь Налайхын элс шохойны орд хотод хамгийн ойр түгээмэл тархацтай ордын нэг. Барилгын ба технологийн элс гаргаж байгаа Монгол элс компаниас гадна хэд хэдэн карьер энд ажиллаж байна.
Материалын үйлдвэрүүдийг дэмжих, үйлдвэрлэлийг нэмэгдүүлэх зорилгоор энэ онд 100 гаруй тэрбум төгрөгийн хөнгөлөлттэй зээлийг аж ахуйн нэгжүүдэд олгоод байна. Засгийн газраас анх удаа үндэсний барилгын материалын үйлдвэрүүдэд дэмжлэг үзүүлсэнд баяртай байна гэж үйлдвэрлэгчид хэлж байв.
Энэ зээл үр өгөөжөө хир өгч байгаатай салбарын сайд танилцсан. Дотооддоо үйлдвэрлэх боломжтой материалын хангамж, үйлдвэрлэлийн технологи өмнөх жилүүдийнхээс эрс өөрчлөлт авчирчээ. Цемент, тоосго, хөнгөн блок, цэвэр усны шугамд хэрэглэж буй PVC хоолой зэрэг үйлдвэрлэлээс гадна байгалийн түгээмэл тархацтай баялаг олборлогчдыг дэмжсэн бодлого барилгын материалын үнийг тогтворжуулжээ.
Цаашид Налайх дүүрэгт барилгын материалын цогцолбор хөгжүүлбэл ирэх жилүүдэд зөвхөн орон нутагт гэлтгүй нийслэлд орон сууцны үнэ буурах боломж байна.
Барилга хот байгуулалтын сайд Ц.Баярсайхан дүүргийн цэвэрлэх байгууламжтай танилцсан. Туул гол руу бохироо асгачихаж байгаа тус байгууламжийн асуудлыг нийслэлтэй хамтад нь шийдэх хэрэгтэй. Тусад нь хийнэ гэвэл хэдэн жилийн ажил болно. Иймд яам, нийслэл, орон нутаг нэг ойлголттой байж энэ асуудлыг шийдвэрлэхээр болов.