Швейцарын Давос хотноо болж буй Дэлхийн эдийн засгийн 56 дахь удаагийн чуулга уулзалтын үеэр Монгол Улсын Ерөнхий сайд Г.Занданшатар Люксембургийн Их Гүнт Улсын Ерөнхий Сайд Люк Фриеден нар уулзлаа.
2026 онд манай хоёр улс дипломат харилцаа тогтоосны 50 жилийн ой тохиож буй бөгөөд түүхэн ойг тохиолдуулан дээд, өндөр түвшний айлчлал харилцаа, хамтын ажиллагааг улам баяжуулахад чухал ач холбогдолтой гэж Ерөнхий сайд нар тэмдэглэв.
Ерөнхий сайд Г.Занданшатар Люксембургийн Их Гүнт Улсын Засгийн газраас эрүүл мэндийн салбар, ялангуяа зүрх судасны чиглэлээр тусламж үзүүлж ирсэнд талархлаа илэрхийлэв.
Мөн түүнчлэн энэ оны наймдугаар сард Улаанбаатар хотноо зохион байгуулах НҮБ-ын Цөлжилттэй тэмцэх конвенцын талуудын 17 дугаар бага хурал (COP17) болон зургадугаар сард болох Монголын эдийн засгийн форумын талаар танилцуулж, Ерөнхий Сайд Люк Фриеденийг Монгол Улсад айлчлахыг урилаа.
Талууд ойрын хугацаанд Давхар татварын хэлэлцээр байгуулах болон дээд, өндөр түвшний айлчлалыг хэрэгжүүлэх асуудлаар үргэлжлүүлэн ажиллахаар тохиров.