ШШГЕГ-ын харяа Өвөрхангай аймгийн Хархорин сум дахь Шийдвэр гүйцэтгэх алба байгуулагдсаны 40 жилийн ой энэ жил тохиож байгаа билээ. Ойн баярын ажлын хүрээнд албан хаагчдынхаа ажиллах ая тухтай орчин нөхцөлийг бүрдүүлэх, тэдний чөлөөт цагийг зөв, үр дүнтэй өнгөрүүлэхэд анхаарч бялдаржуулах танхим, снукер биллъяард, теннисний болон хувцас солих өрөө, саун, халуун усны өрөө зэргийг тохижуулан ажиллажээ. Түүнчлэн албан хаагчдын алжаал тайлах, амрах, сэтгэл заслын үйлчилгээ үзүүлэх өрөөг шинээр барьж, тохижуулахаар зураг төслийг боловсруулжээ. Албан хаагчдынхаа идэвх санаачлагыг дэмжих, урам зоригийг сэргээхэд чиглэсэн спорт, урлагийн арга хэмжээнүүдийг зохион байгуулсан байна. Мөн Тулгар төр байгуулагдсаны 2222 жилийн ой, Их Монгол улс байгуулагдсаны 807 жилийн ой, Ардын хувьсгалын 92 жилийн ойн баяр наадмыг угтан албаныхаа 40 жилийн ойг тохиолдуулж, МҮОНТ-ийн уран бүтээлийн 2 дугаар нэгдэлтэй хамтран “Нар өнжсөн өдөр” уралдаант, цэнгээнт нэвтрүүлгийг 6 дугаар 22, 23-ны өдрүүдэд бэлтгэн олон нийтэд хүргэжээ. Нэвтрүүлэгт тус албаны нэр бүхий 12 албан хаагч буюу 6 баг оролцон спортын 10 төрлөөр авьяас чадвар, авхаалж, самбаа, хурд хүчээ сорин оролцсон байна.
