Монгол Улсаас Нью-Йоркт суугаа НҮБ-ын Байнгын төлөөлөгчийн газар Дэлхийн байгаль орчны өдрийг "Бод-Хэрэглэ-Хэмнэ-Хүнсний хаягдлаа багасга" сэдвийн хүрээнд тусгай арга хэмжээг Байгаль орчны хөтөлбөрийн салбартай хамтран энэ сарын 5-нд зохион байгуулж, амжилттай тэмдэглэн өнгөрүүлэв.
Уг арга хэмжээнд Нью-Йорк дахь НҮБ-ын Байгаль орчны хөтөлбөрийн салбарын захирал Мунярадзи Ченжи, НҮБ-ын Хүнс хөдөө аж ахуйн байгууллагын "Хүнсний хэмнэлт санаачилга"-ын ахлах ажилтан Тошихико Мурата, Байгалийн баялгийг хамгаалах зөвлөлийн Бодлогын зөвлөх Саша Луица нар болон НҮБ-ын гишүүн орнууд, олон улсын байгууллагууд, шинжлэх ухаан, иргэний нийгэмийн төлөөлөл болох нийт 90 хүн идэвхтэй оролцов.
Арга хэмжээг Нью-Йорк дахь салбарын захирал Мунярадзи Ченжи нээж, Дэлхийн байгаль орчны өдрийг Монгол Улсын Засгийн газар НҮБ-ын Байгаль орчны хөтөлбөрийн газартай хамтран олон улсын хэмжээнд энэ долоо хоногийн турш амжилттай тэмдэглэж буйг дурдан Монгол Улсын Ерөнхийлөгч, Засгийн газар, ард түмэнд талархал дэвшүүлж, Ерөнхийлөгч Ц.Элбэгдоржийн НҮБ-ын Байгаль орчны хөтөлбөрийн газрын Гүйцэтгэх Захирал Аким Штайнертай хийсэн уулзалт болон Монголд болж буй арга хэмжээний талаарх мэдээлэл бүхий дүрс бичлэгийг үзүүлэв.
Дараа нь Монгол Улсаас Нью-Йоркт суугаа НҮБ-ын Байнгын төлөөлөгч О.Оч үг хэлж, Монголын Шинэчлэлийн Засгийн газраас байгаль орчны талаар явуулж буй бодлого, үйл ажиллагаа, дэлхий нийтийн байгаль орчны талаарх үйл хэрэгт манай улсын оруулж буй хувь нэмэр, Дэлхийн байгаль орчны өдрийг тохиолдуулан зохион байгуулж буй арга хэмжээнүүдийн талаар, мөн цаашид Ерөнхийлөгч, Засгийн газрын зүгээс авахаар төлөвлөж үйл ажиллагааны талаар мэдээлж, Байгаль орчин, ногоон хөгжлийн сайд С.Оюуны дүрст мэндчилгээг арга хэмжээнд оролцогчдод толилуулав.
Түүнчлэн, хүнсний хэмнэлттэй хэрэглээний талаар Тошихико Мурата, Саша Луица нар сонирхолтой илтгэл тавьж, төлөөлөгчдийн асуутад хариулсны зэрэгцээ Дэлхийн байгаль орчны өдөрт зориулсан Монгол Улсын Ерөнхийлөгч, Ерөнхий сайд нарын илгээлтийг танилцууллаа.
