“Аймгийн хөгжилд Ахмадын оролцоо”нээлттэй хэлэлцүүлэг 2013 оны 3 дугаар сарын 6-ны өдөр аймгийн Иргэний танхимд зохион байгуулагдлаа. Хэлэлцүүлгийг Аймгийн ИТХ-ын дарга Ч.Цэндсүрэн нээж, Иргэний танхимын дарга Л.Гүнчин хэлэлцүүлгийг удирдан явууллаа.
“Аймгийн хөгжилд Ахмадын оролцоо”нээлттэй хэлэлцүүлэгт Дархан, Орхон, Хонгор, Шарын гол сумын нийт 63 ахмад настан оролцсон юм.
Хэлэлцүүлгийн эхэнд Төрөөс ахмадуудын талаар баримталж буй бодлого сэдвээр аймгийн ЗДТГ-ын Нийгмийн хөгжлийн хэлтсийн дарга Л.Золбоот, Ахмад настанд үзүүлж буй халамж үйлчилгээний талаар аймгийн Нийгмийн халамж үйлчилгээний хэлтсийн дарга Ж.Ганболд, НДСангаас ахмад настнуудад олгох тэтгэвэр, тэтгэмжийн талаар аймгийн Нийгмийн даатгалын хэлтсийн мэргэжилтэн н.Төмөрсүх тус тус мэдээлэл хийлээ.
Хэлэлцүүлгийн үеэр хэд хэдэн оролцогчоос ахмадуудыг харъяалалтай болгох асуудлыг хөндсөн юм.
Дархан суманд 6300-гаад ахмад настан бий. Тэдгээрийн 50-60 хувь нь харъяалалгүй байдаг гэнэ.
Ахмадын үйлдвэр, үйлчилгээ худалдааны төв буюу хөгжлийн төвтэй болох асуудлыг Дархан сумын Ахмадын хорооны даргын зүгээс илэрхийлж байсан ч зарим ахмадууд бид соёл урлагаар дутаагүй. Бидэнд өнөөдөр ахмадуудыг үйлдвэрлэлийн ажилд татан оролцуулах, юмханаар юм хийлгэх зохион байгуулалт дутаж байна гэж үзэж байсан юм.
Дарханд хэд хэдэн ахмадын байгууллагын байр бий. Энд гарын ур дүйтэй гартай чадалтай байгаа ахмадуудаа нэгтгээд үйлдвэрлэл эхлүүлж болно. Тэтгэвэрт сууж байгаа хүмүүсийн дунд нягтлан, эдийн засагч, багш, зураач, оёдолчид гээд асар их ажил мэргэжлийн туршлагатай хүмүүс байна. Энэ хүмүүсийг нэгтгэж ажиллуулах хэрэгтэй гэсэн санал гарлаа.
Ахмадуудад зориулсан 64 айлын орон сууцыг ашиглалтанд оруулах талаар дэмжиж, ахмадын амралтын газар, ахмадын тасгийн үйл ажиллагааг чанаржуулах хэрэгтэй гэв.
Нийгмийн даатгал, нийгмийн халамжийн ажилтнууд багуудад ажиллаж багийн ахмадуудад хууль эрхзүйн өөрчлөлт мэдээллийг тогтмол өгч байх, багийн ахмадын зөвлөлийн дарга нарын урамшуулалыг нэмэх, байгууллага бүрт ахмадын зөвлөл ажиллаж, тэднийхээ санал бодлыг сонсдог болох гээд олон санал санаачилгууд хэлэлцүүлгийн үеэр хөндөгдсөн юм.
Мал маллах боломжтой ахмадууд хөдөө орон нутагт олон байгаа тул ахмадыг малжуулах талаар анхаарахыг санууллаа.
Мөн мод тарих талбай өгч их хотоо ногооруулах үйлсэд ахмадуудын хүчийг ашиглахыг санал болгож ахмад настнуудад зориулсан эмийн сан байгуулж өгөхийг хүсэж байлаа.
Ахмад настнуудын өмнө тулгамдсан эдгээр олон асуудлуудыг нэг удаа хэлэлцээд өнгөрөхгүй. Ирэх 4 дүгээр сарын эхээр “1000 ахмадын” чуулганыг зохион байгуулж, тулгамдаж буй асуудлуудаас гарах арга замаа тодорхойлох нь зүйтэй гэж үзлээ. Ингээд “1000 ахмад”-ын анхдугаар чуулганыг зохион байгуулах ажлын хэсгийг Дархан сумын ахмадын хорооны дарга Д.Тожилоор ахлуулан байгуулж зохион байгуулах гишүүдийг баталснаар энэ удаагийн хэлэлцүүлэг өндөрлөсөн юм