Уул уурхай, хүнд үйлдвэрийн яам нь геологи, хайгуул, уул уурхай, олборлох болон боловсруулах салбарын үндсэн асуудлууд, цаашид авах арга хэмжээг тодорхойлох зорилгоор “ТОГТВОРТОЙ ХӨГЖИЛД УУЛ УУРХАЙ”бодлогын зөвлөгөөнийг 2017 оны 12 дугаар сарын 08-нд зохион байгуулаа. Монгол орноо төв, баруун, зүүн, говийн бүсэд хуваан чуулган зохион байгуулсны үндсэн дээр уг нэгдсэн зөвлөгөөнийг нийслэлд зохион байгуулсан юм.
Уул уурхай, хүнд үйлдвэрийн сайд Д.Сумьяабазар уул уурхайн салбарын суурь асуудлуудыг “ЗАСАГЛАЛ, ХУУЛЬ ЭРХ ЗҮЙ, БАЙГАЛЬ ОРЧИН, ОРОН НУТАГ-ХАМТЫН АЖИЛЛАГАА, ДЭД БҮТЭЦ, ХӨРӨНГӨ ОРУУЛАЛТЫН ТОГТОЛЦОО”-ны хүрээнд томъёолж, цаашид хэрхэн сайжруулах, олон улсын туршлагад хэрхэн нийцүүлэх талаар идэвхитэй санал, шүүмжлэл өрнүүлэн оролцохыг уг зөвлөгөөнд оролцогчдоос хүсэв. Мөн хамтран ажиллаж, зохион байгуулсан СЕСМИМ төсөлд талархал илэрхийллээ.
Монгол Улс нь уул уурхайн салбарын эрх зүйн орчныг цогцоор нь шийдэх бус гагцхүү зарим асуудлуудын хүрээнд шийдэхийг эрмэлзэж байсан нь өнөөг хүртэл сайны хажуугаар саар үр дүнг бий болгож байсан. Үүнийг 1994-2006 оны хооронд батлагдсан 3 удаагийн Ашигт малтмалын тухай хууль, түүний дотор 2006 оны Ашигт малтмалын тухай хуульд өнөөг хүртэл 250 гаруй нэмэлт, өөрчлөлт оруулаад буй. Түүнчлэн уул уурхай болон байгаль орчны салбарын өөр хоорондын уялдаа холбоог хангах бодит эрх зүйн зохицуулалт буюу уурхайн хаалтын зарчим бүрэн гүйцэд нутагшаагүй жишээгээр тус тус тайлбарласан салбар илтгэл, мэдээлэл, хэлэлцүүлэг нь зөвлөгөөний ач холбогдлыг өндөрт өргөж байлаа.