УИХ-ын Нийгмийн бодлого, боловсрол, соёл, шинжлэх ухааны байнгын хорооны 03 тоот тогтоолоор байгуулагдсан Эмнэлгийн барилгын өнөөгийн байдалтай танилцах, үнэлэлт, дүгнэлт өгөх, цаашид авах арга хэмжээний талаар санал, дүгнэлт боловсруулах үүрэг бүхий ажлынхэсэг Сүхбаатар дүүргийн эрүүл мэндийн нэгдэл, Улсын 2-р төв эмнэлэг, Эх хүүхдийн эрүүл мэндийн үндэсний төв, Гэмтэл согог судлалын үндэсний төв, Улсын 3-р төв эмнэлэг зэрэг эрүүл мэндийн байгууллагуудын эзэмшил газрын үйл ажиллагаатай газар дээр нь танилцлаа.
УИХ-ын гишүүн Л.Эрдэнэчимэгээр ахлуулсан ажлын хэсэгт Улсын Их Хурлын гишүүн Ж.Батсуурь, Улсын Их Хурлын гишүүн Г.Баярсайхан, Эрүүл мэндийн яамны Бодлогын хэрэгжилтийг зохицуулах газрын дарга Д.Мөнхбат, Эрүүл мэндийн яамны Барилга захиалагчийн албаны дарга Ж.Нэргүй, Эрүүл мэндийн яамны Эмнэлгийн тусламж үйлчилгээний чанар, аюулгүй байдлыг хариуцсан мэргэжилтэн А.Өнөржаргал, УИХ-ын НББСШУБХ-ны зөвлөх Ж.Чимгээ, УИХ-ын Тамгын газрын Хяналт үнэлгээний хэлтсийн референт Н.Сүхбаатар, УИХ-ын НББСШУБХ-ны референт М.Отгон нар ажиллалаа.
Ажлын хэсгийн гишүүд дээр дурдсан эмнэлгүүдийн эзэмшил газрын өнөөгийн байдалтай газар дээр нь танилцаж, эмнэлгийн удирдлага, холбогдох хүмүүстэй уулзаж, санал хүсэлтийг сонсон эзэмшил газартай холбоотой зөрчил, тулгамдсан асуудлыг хэрхэн шийдвэрлэх талаар санал солилцож, шийдвэрлэх арга замыг тодорхойллоо.
Уг ажлын хүрээнд хийгдсэн шалгалтын дүнг НББСШУБХ-ноос тогтоол гарган Засгийн газарт чиглэл өгөх бөгөөд хэрэгжилтэнд хяналт тавьж ажиллах юм.