Дархан сумын 15 дугаар багийн нутаг дэвсгэрт орших 11 дүгээр цэцэрлэг нь улсын төсвийн хөрөнгө оруулалтаар 100 хүүхдийн хүчин чадалтайгаар баригдаж, 2015 оны 9 дүгээр сарын 01-ны өдөр 120 хүүхэд, 19 багш ажилчидтайгаар үйл ажиллагаагаа явуулж эхэлсэн.
Дархан сумын 15 дугаар баг нь тус сумын хамгийн олон оршин суугч буюу арваад мянган хүн амтай, Мангирт, Хабитат зэрэг гэр хорооллын олон мянган айл өрхтэй, айл өрхүүд нь дотроо есөн хэсэгтэй томоохон хороолол юм.
2016-2017 оны хичээлийн жилд тус багийн 148 хүүхдэд сургуулийн өмнөх боловсрол олгож байна.
Тус цэцэрлэг нь “Эрүүл, чийрэг бие бялдартай эерэг зан чанартай, цогц чадамжтай монгол иргэнийг төлөвшүүлэхэд, багш, сурган хүмүүжүүлэгч, эцэг эх, хамт олон бидний үлгэр дууриалал чухал” гэсэн үзэл дор боловсролын чанарын шинэчлэлийг хэрэгжүүлэхэд багийн менежментыг чухалчлан үр дүнд хүрэх зорилго тавьсан.
Сургалтын үйл ажиллагаандаа “Хэл заслын танхим“-ыг шинээр нээн хүүхдүүдийн авиан дуудлагыг сайжруулж, хэл зүгшрүүлэхэд анхаарч байна.
Мэргэжлийн багшаар 100 хувь хангагдсан. Үүнээс магистр зэрэгтэй багш 1, бакалавр зэрэгтэй 5 багш ажилладаг.
11 дүгээр цэцэрлэгийн хамт олон хүүхдийн хүсэж тэмүүлсэн аз жаргалтай орчин бүрдүүлэх, хүүхэд бүрийг хөгжүүлэх, тэдэнд илүү ихийг сурах, судлах, турших, хэрэгжүүлэх боломж олгохын төлөө хичээн ажиллаж байна. Хүүхдийн хүсэл сонирхолд хөтлөгдөн ажилласан бүтээлч ажлууд үр дүнгээ өгч байгаа гэж тус цэцэрлэгийн багш нар ярьж байна.
- “Авьяас” хөтөлбөрийн хүрээнд аймгийн хэмжээнд 2015 онд зохион байгуулсан цэцэрлэгүүдийн дундах “Найрал дууны” тэмцээнд тусгай байр, 2016 онд IV байранд тус тус шалгарсан6
- “Ном” хөтөлбөрийн хүрээнд бүлгүүдийн дунд 2-5 насны хүүхдийн хөгжлийн онцлогт тохирсон “Номтой нөхөрлөх” аян, “Үлгэрийн баатрууд амилсан нь” жүжигчилсэн тоглолт зохион байгуулав6
- “Ээжээ зурая - 2016” гар зургийн уралдааны 4-5 насны ангилалд дунд бэлтгэл бүлгийн М.Урангоо амжилттай оролцож тусгай байранд шалгарав.
- “Халуун сэтгэл” аянд оролцож аймгийн НААҮГ-ын тохижилт цэвэрлэгээний ажилчдад сэтгэлийн дэм өгч, халуун аарцаар үйлчлэн, хүүхдүүдийн гарын бүтээлийг бэлэглэв.
- “Хариу нэхээгүй сайн үйлс” -ийн аяны хүрээнд бэлтгэл бүлгийн суралцагч М.Анхбаяр, Б.Солдат нарын ар гэрт цэцэрлэгийн хамт олноос мөнгөн тусламж үзүүлж, иж бүрэн хувцас бэлэглэлээ.
- “Эрүүл монгол хүүхэд” хөтөлбөрийн хүрээнд хөдөлгөөн, эрүүл мэнд, зөв зохистой хооллолтын сургалт, эрүүл мэндийн үзлэг оношлогоог аймгийн Эрүүл мэндийн төвтэй хамтарч байнга зохион байгуулж байна. Тухайлбал: 2015 онд хүүхдийн шүдний өвчлөлийг илрүүлэн, эрүүлжүүллээ. 2016 онд багш ажилчдынхаа эрүүл мэндэд анхаарч нарийн мэргэжлийн эмч нарын үзлэгт 100 хувь хамруулав. Мөн эцэг, эх, багш, ажилчдын дунд Шилжин явах цомын төлөөх “Гар бөмбөгийн нөхөрсөг тэмцээн” зохион байгуулж хэвшсэн.
Дарханы мэдээ сонин 2017 он. 4 дүгээр сарын дугаарт