Уул уурхайн сайд Д.Ганхуяг энэ сарын 21-24-нд Австралийн Холбооны улсад ажлын айлчлал хийв.
Энэ үеэр Австралийн Эрдэс баялаг, эрчим хүч, аялал жуулчлалын сайд Гари Грэйтэй хоёр талын уулзалт хийж ил тод, хариуцлагатай, тогтвортой, эрүүл мэнд, байгаль орчинд ээлтэй уул уурхайг хөгжүүлэх, Австралийн Олон улсын хөгжлийн агентлагийн Ерөнхий захирал П.Бакстертэй албаны уулзалт хийж Австралийн Засгийн газраас манай улсад ирэх таван жилийн хугацаанд үзүүлэх тусламжийн хөтөлбөрт багтсан “Уул уурхайг хөгжилд зориулъя” төслийг хэрэгжүүлэхэд тус тус хамтран ажиллахаар тохиролцов.
Сайд Д.Ганхуяг Австралийн засгийн газраас олгодог боловсролын тэтгэлгийн тодорхой хэсгийг уул уурхайн салбарын мэрэгжилтнийг бэлтгэх, давтан бэлтгэхэд зарцуулж байхыг ноён Бакстерт санал болгов.
Түүнчлэн сайд Д.Ганхуяг Нью Саут Уэльс мужийн Эрдэс баялаг, эрчим хүчний сайд К.Харчертэй уулзаж харилцан сонирхсон асуудлаар санал солилцов. Харчер нь тус мужийн байгаль орчны сайдаар ажиллаж байхдаа 1999 онд Монголд очиж тахь дахин нутагшуулах ажлыг эхлүүлж байсан юм.
Уул уурхайн сайд Д.Ганхуяг тэргүүтэй төлөөлөгчид Нью Саут Уэльсийн Их сургуулийн харьяа Уул уурхайн инженерийн сургуулиар сайд Д.Ганхуяг тэргүүтэй төлөөлөгчид зочилж оюутан, мэргэжилтнүүдийг бэлтгэдэг орчин үеийн сургалтын техник хэрэгсэл, виртуаль модультай танилцав.Мөн Уул уурхайн Яам, тус сургуулийн хооронд цаашид мэргэжилтэн, оюутнуудыг уул уурхайн нарийн мэргэжлийн чиглэлээр сургахад хоёр тал хамтран ажиллахаар тохиролцож холбогдох баримт бичиг байгуулжээ.
Австрали-Монголын Уул уурхайн яам хоорондын хамтарсан ажлын хэсгийн хоёрдугаар хуралдаан мөн айлчлалын үеэр болж, дараагийн хуралдааныг Улаанбаатар хотод хийхээр тогтов. Төлөөлөгчид Австралийн Бизнес зөвлөл, Эрдэс баялгийн зөвлөлийн гишүүн компаниудын төлөөлөлтэй уулзаж уул уурхайн салбар, гадаадын хөрөнгө оруулалтын орчны талаар мэдээлэл өгч санал солилцов.
Төлөөлөгчид Сидней хотод Австралийн Засгийн газраас зохион байгуулсан “Уул уурхайг хөгжилд зориулъя” олон улсын хурал, Олборлох үйлдвэрлэлийн ил тод байдлын санаачилгын хорооноос зохион байгуулсан “Олборлох үйлдвэрлэлийн ил тод байдлын санаачилгын олон улсын зургаа дахь удаагийн хурал”-д тус тус оролцлоо.
