МЭНДЧИЛГЭЭ

Эрхэм хүндэт Дарханчууд та бүхэнтэйгээ 1924 оны 11 дүгээр сарын 26-ны өдөр Монгол Улсын анхдугаар Үндсэн хуулиа баталж, Бүгд Найрамдах засаглалд шилжин, үндэсний ардчилсан өөрчлөлт, эрх зүйн болон улс төрийн цоо шинэ тогтолцоог хуульчилан баталгаажуулсан түүхт өдөр мэндчилж байгаадаа баяртай байна.

Энэ онд УИХ-ын болон орон нутгийн сонгууль явагдаж, нийт Дарханчууд маань МАН-д их итгэл хүлээлгэж, Д.Хаянхярваа, Б.Баттөмөр. Б.Жавхлан нарыг УИХ-д илгээсэн бөгөөд орон нутгийн сонгуульд Дархан-Уул аймгийн МАН “Есөн эрдэнийн”мөрийн хөтөлбөрөө хэрэгжүүлэх боломжоор хангагдан, "Аймгийн засаг даргын 2017-2020 оны үйл ажиллагааны хөтөлбөр”-ийг нийт 9 бүлэг,142 арга хэмжээтэйгээр төлөвлөн ИТХурлаараа амжилттай батлуулаа.

Монгол Улсын эдийн засгийн өнөөгийн нөхцөл байдал хангалттай сайн байгаа биш хэдийч бид боломжоо дайчлан аймгийн Засаг даргын ажлын 100 хоногт аймагтаа хөрөнгө оруулалт , бүтээн байгуулалтын чиглэлээр зургаан тэр бум 275 сая төгрөгийн ажлыг амжилттай хийж гүйцэтгэлээ,

Хамгийн томоохон ажил гэвэл шинэ хуучин Дарханыг холбосон 2,4 км урттай 14 метрийн өргөнтэй ,хоёр урсгалтай ,нэгдүгээр зэрэглэлийн автозамыг гүйцээж, хотынхоо түүхт 55 жилийн ойгоор ашиглалтанд орууллаа. Мөн Дархан хотыг анх байгуулж байх үед төлөвлөгдсөн хотын үндсэн магистрал 8 км шугамын ажлыг эхлүүлж, анх удаа орон нутгийн төсвөөр барьж чадлаа,

Бид өнгөрөгч дөрвөн жилд “Жишиг хороолол”төслийг амжилттай хэрэгжүүлсэн бол ирэх дөрвөн жилд “Тохилог хороолол” төслийг гэр хорооллуудад хэрэгжүүлэхээр төлөвлөж байна.

2016 оны сүүлийн хагаст ХАА-н салбарт багагүй амжилт гаргалаа.Тухайлбал: 2016 онд 52 ААНэгж, 61 иргэн үр тарианы үйлдвэрлэл,38 ААНэгж, төмс, хүнсний ногооны үйлдвэрлэлийг нийтдээ 18,5 мянган га талбайд эрхлэн явууллаа. Ургац хураалтын эцсийн дүнгээр 18930,8 тн үр тариа, үүнээс 17110,2 тн улаан буудай, 6600,8 тн төмс, 15298,4 тн хүнсний ногоо хураан авлаа. Хураасан ургацын хэмжээг 2015 оны ургацтай харьцуулбал улаан буудай 13297,7 тн-оор, төмс 3669 тн-оор, хүнсний ногоо 10603 тн-оор тус тус илүү хураан авсан дүнтэй байна.

Нэгжээс авсан ургацын хувьд улаан буудай 1 га-гаас 17,6 цн, төмс 109 цн, хүнсний ногоо 119,5 цн-г тус тус хураан авсан байна.Энэхүү хураан авсан улаан буудай, хүнсний ногооны ургац, 1 га-гаас авсан хэмжээ нь манай аймгийн хувьд сүүлийн 20 жилд хураан авсан хамгийн өндөр ургац хураан авсан жил болж байна.

Мал аж ахуйн салбарын өвөлжилтийн бэлтгэлийн тухайд:

2016-2017 оны өвөл хонин толгойд шилжүүлснээр 659,3 мянган толгой мал манай аймгийн хэмжээнд өвөлжиж хаваржина. Өвлийн бэлтгэлийг хангах ажлын хүрээнд малчид, мал бүхий иргэдийн түвшинд 61,6 мянган тн байгалийн хадлан, 3,0 мянган тн үйлдвэрийн тэжээл, 746,6 тн сүрэл, ногоон тэжээл, гар тэжээл, 976 тн давс, хужир, шүү бэлтгэж нөөцөлсөн байна.

Монгол улсын Засгийн Газрын 2016 оны 322 тоот тогтоолын хүрээнд аймаг, сумын нөөц бүрдүүлэх чиглэлээр онцгой анхаарч ажилласны үр дүнд 306,4 тн өвс, 69 тн тэжээл бэлтгэж, мал аж ахуй, хөдөө аж ахуйн өвөлжилтийн бэлтгэлийг 91 хувь буюу сайн хангасан үнэлгээтэй байгаа юм.

Дарханчууд бид энэ өвлийн хахир хатууг үл ажран бэлтгэлээ сайтар базааж, урин хавартайгаа золгохоор шамдан хөдөлмөрлөж байна.

Ингээд нийт Дарханчууддаа Монгол Улс анхдугаар “Үндсэн хууль”-аа баталж, Бүгд Найрамдах Улсаа тунхагласаны түүхт 92 жилийн ойн баярын мэндийг өргөн дэвшүүлье.

Хүндэтгэсэн,

ДАРХАН-УУЛ АЙМГИЙН ЗАСАГ ДАРГА С.НАСАНБАТ