Ажилгүйдлыг бууруулах, ялангуяа 18-35 насны залуусыг ажилтай, орлоготой болгохын тулд аймгийн удирдлагуудын зүгээс холбогдох байгууллагуудтай хамтран олон ажлуудыг бодлогоор хийхээр төлөвлөсөн. Энэ хүрээнд өнөөдөр /2016.11.21/ “Хөдөлмөр эрхлэлтийн хүрээнд орон нутгийн бодлого, санаачилгыг өрнүүлэх нь” сэдэвт семинар Нутгийн удирдлагын ордноо боллоо. Өнөөдрийн үйл ажиллагаа аймгийн Засаг даргын нийгмийн бодлого, төсөл хөтөлбөр хариуцсан орлогч А.Түвшинбат үг хэлснээр эхэлсэн юм. Тус семинарт МАОЭНХ-ны гүйцэтгэх захирал Х.Ганбаатар, Залуучуудын хөдөлмөр эрхлэлтийг дэмжих төслийн захирал Т.Энхтуяа, ХХҮГ-ын дарга, мэргэжилтнүүд, Хөдөлмөр эрхлэлтийн салбар зөвлөлийн гишүүд, ажил олгогчдын төлөөллүүд оролцов.Энэхүү семинар нь залуучуудын хөдөлмөр эрхлэлт, гарааны бизнесийн талаарх орон нутгийн бодлого, санаачилгыг өрнүүлэх, түншлэл, хамтын ажиллагааг хөгжүүлэхэд дэмжлэг үзүүлэх зорилготой.
Энэ үеэр залуусын хөдөлмөр эрхлэлтийг орон нутгийн зүгээс хэрхэн дэмжих, гадны хөрөнгө оруулалттай төсөл хөтөлбөрүүдийг аймгийн бодлогод уялдуулах чиглэлээр хэлэлцлээ. Тухайлбал: Швейцарийн Хөгжлийн агентлагийн санхүүжилтээр 2016 оны 1 дүгээр сараас эхлэн Залуучуудын хөдөлмөр эрхлэлтийг дэмжих төсөл баруун таван аймаг, Баянхонгор, Өмнөговь, Дархан-Уул аймгуудад хэрэгжиж байгаа ажээ. Тус төсөлд залуусыг хамруулж,бизнесийн гарааг нь эхлүүлэх талаар санал солилцсон юм.
Улсын хэмжээнд 18-35 насны залуучуудын 16 хувь нь ажилгүй иргэдийн тоонд ордог байна. Энэ нь ОУ-ын дундаж хувиас дээгүүр үзүүлэлт юм. Манай аймгийн хувьд дээрх насны ажилгүй 8000 гаруй иргэн байдгаас идэвхтэй ажил хайгч 2100 гаруй иргэн байдаг ажээ. Энэ тоог дахин судалж, эдгээр иргэдээс хэд нь ажлын байр захиалагч ААНБ-иудын ажлын байрны тодорхойлолтод нийцэх тухай бодит судалгааг эн тэргүүнд гаргах, ХХҮГ-ын Хөдөлмөр эрхлэлтийн хэлтэс болон хөдөлмөр эрхлэлттэй холбоотой аймгийн салбар хороо, зөвлөлүүд хамтран ажилгүй иргэдийг мэргэшүүлэх сургалтад хамруулах зэрэг ажлуудыг хийх тухай хурлаар шийдвэрлэв. Ийнхүү семинарын үеэр хэлэлцэгдсэн саналуудыг Хөдөлмөр эрхлэлтийн үндэсний зөвлөхөөр батлуулж 2017 онд хэрэгжүүлэх арга хэмжээний төсөлд тусгах юм.
М.ГҮНЖИЛХАМ