ХОТЫНХОО 55 ЖИЛИЙН ОЙН БАЯРЫГ ДАРХАНЧУУД УРЛАГ СОЁЛ, СПОРТЫН НААДМААР ЭХЛҮҮЛЭВ
Урлаг, соёл, спортын их наадмыг 9 дүгээр сарын 24-ний өдөр Дархан-50 цогцолборт албан ёсоор нээв. Нээлтийн үеэр Залуучууд театрын уран бүтээлчид ая дуугаа өргөж, ОИЦ сургуулийн 68 хүүхдийн бүрэлдэхүүнтэй хамтлаг “Кобой бүжиг”, 15 дугаар сургуулийн 450 сурагч “Бие биелэгээ”, 18 дугаар цэцэрлэгийн багачууд “Монгол бүжгийн цоморлиг” зэрэг урлагийн тоглолтоор бэлэг барьсан юм.
Их наадмын хүрээнд “Хүүхдийн язгуур урлагийн наадам”, “Оюутны урлагийн их наадам” зохион байгуулж, гар бөмбөг, хөл бөмбөг, сагсан бөмбөг, үндэсний бөх зэрэг спортын тэмцээнүүдийг нас насны ангиллаар зохион байгуулж аваргуудаа шалгаруулсан юм.
“Хөгжлийн загвар Дархан” сэдэвт багш, оюутны эрдэм шинжилгээний бага хурал, ЕБС-ын сурагчдын дунд “Миний Дархан хотын ирээдүй” эссэ бичлэгийн уралдаан, “Номын баатрууд амилсан нь” үлгэрийн баатруудын дүрийн тоглолт зэрэг олон талт үйл ажиллагааг зохион байгууллаа.
УРЛАГИЙН ИХ НААДАМД 1800 АХМАД НАСТАН, 124 ХҮҮХЭД ОРОЛЦЛОО
Ахмадын урлагийн их наадмыг 8-н төрлөөр 3-н үе шаттайгаар зохион байгуулж, давхардсан тоогоор 1800 орчим ахмад уран сайханч оролцлоо.
Шигшээ шалгаруулалтад 300 гаруй уран сайханч 36 медалийн төлөө өрсөлдсөн байна. Багийн дүнгээр Б.Эрдэнэбаяр даргатай 11-р багийн ахмадын зөвлөл тэргүүлж, Ш.Үржинханд даргатай 16-р багийн ахмадын зөвлөл, Алтанцэцэг ахлагчтай Шарын гол сумын ахмад уран сайханчид удаах байруудад шалгарчээ.
Харин “Хүүхдийн язгуур урлагийн наадам”-ын 1-р шатны шалгаруулалт сургууль тус бүр дээрээ зохиогдсон юм.
Наадмын 2-р шатны шалгаруулалтад ЕБ-ын 1, 6, 9, 15, 18, Од, ОИЦ сургууль, Жигүүр, Монгол Оюу зэрэг нийт есөн сургуулийн 124 сурагч оролцож, 45 сурагч сүүлийн шатны шалгаруулалтад үлдсэн байна.
ДАРХАНЧУУД ХОТЫНХОО ОЙГООР НИЙТИЙН БҮЖГЭЭР ӨРСӨЛДӨВ
Дархан хотын 55 жилийн ойн нэрэмжит нийтийн бүжгийн спортын аварга шалгаруулах тэмцээнийг аймгийн ЗДТГ, Эмэгтэйчүүдийн холбоо, Нийтийн бүжгийн холбооны Дархан-Уул аймаг дахь салбар зөвлөл, БТСГ-аас хамтран зохион байгуулав.
Тэмцээн 45 наснаас доош, 45 наснаас дээш гэсэн хоёр насны ангиллаар үндэсний, европ бүжгийн төрлөөр зохион байгуулагдсан бөгөөд 6 хамтлаг, 15 хос нийт 60 гаруй бүжигчид оролцлоо.
Залуучуудын ангилалд: Ирээдүй клубын Шинэ үе баг
Ахмадын насны ангилалд: Сонор клубын Цагаан сарнай баг
Залуучуудын хосын төрөлд: н.Цэнгэлсайхан н.Энхцолмон
Ахмадын хосын төрөлд: н.Амгаланбат, н.Осорням нар тус тус тэргүүлэв.
ДАРХАНД Ц.СЭВЖИДИЙН НЭРЭМЖИТ УЛСЫН IV УРАЛДААНЫ ШИЛДГҮҮДИЙН ТОГЛОЛТ БОЛОВ
Дархан-Уул аймгийн ИТХ, ЗДТГ, Монголын Урлагийн ажилтны холбоо, ҮДБЭЧ хамтран Дархан хотын 55 жилийн ойн баярт зориулан Үндэснийхээ бахархалт бүжгийн урлагыг сэргээн хөгжүүлэх, мэргэжлийн бүжигчдийн урын санг баяжуулах, ахмад үеийнхээ авьяас чадварыг нь үргэлжлүүлэн мөнхжүүлэх зорилготой МУГЖ Сэвжид агсаны нэрэмжит мэргэжлийн бүжигчид, бүжиг дэглээчдийн улсын уралдааныг зохион байгууллаа.
Тус уралдаан нь гурван жил тутам зохион байгуулагдаг бөгөөд энэ жил 10 дахь жилийн ойтойгоо золгож буйгаараа онцлогтой юм байна. Дархан хотын “Залуучууд” театрын тайзнаа ГАЛА тоглолтоо хийсэн энэ уралдаанд ЦДБЭЧ, СУИС, Сүлд чуулга болон Хөвсгөл, Завхан, Дундговь, Дорнод, Увс, Хэнтий, Дархан- Уул аймгийн нийт 270 гаруй уран бүтээлчид оролцож гоцлол бүжиг, цөөхүүл бүжиг, бүжиг дэглээч гэсэн төрөлд авьяас чадвараа сорьцгоов.
Уралдааны гранпри шагналын эзнээр Хэнтий аймгийн Хан хэнтий чуулгын бүжигчид шалгарчээ.
ҮРГЭЛЖЛЭЛ БИЙ...