Эрхэм хүндэт Дарханчууд аа!
Дархан хотынхоо хөгжил дэвшил, хойч үеийнхээ сайн сайхны төлөө цуцалтгүй хөдөлмөрлөж, уйгагүй зүтгэж ирсэн үе үеийн ахмад буурлууд, нутаг орноо хөгжүүлэх ачааны хүндийг үүрч яваа өнөө үеийнхэндээ, Дарханы минь ирээдүй болсон хүүхэд багачууд Та бүхэндээ аймгийн Засаг даргын Тамгын газрын нэрийн өмнөөс болон хувиасаа Дархан хот үүсэн байгуулагдсаны 55 жилийн ойн баярын мэндчилгээ дэвшүүлж, эрүүл энх, аз жаргал, амжилт бүтээлийн дээдийг хүсэн ерөөж байна.
Дархан хотын анхны суурийн чулууг “Бурхантын хөндий”-д 1961 оны 10 дугаар сарын 17-нд тавьж байсан тэр үеэс хойш Дарханчууд бид хамтдаа их түүхийг бүтээж, Та бид Дарханыхан гэж алдарших болсондоо сэтгэл хангалуун түүхт ойн өдөртэйгээ золгож байна.
Тухайн үеийн ЗХУ, Болгар, Чех, Польш, Унгарын техник эдийн засгийн тусламж болон тэдгээр улсын мэргэжилтнүүд, Дарханчууд Та бүхний хичээл зүтгэл, төрөлх хотынхоо төлөө гэсэн сэтгэл зүрх, нөр их хөдөлмөрөөр богино хугацаанд сүндэрлэн боссон Дархан хот өнөөдөр найдвартай, баталгаатай эрчим хүчний эх үүсвэр, дэд бүтцийн хөгжил, эрүүл мэнд, боловсрол, соёл, шинжлэх ухаан, аж үйлдвэр, худалдаа үйлчилгээ, хөдөө аж ахуй зэрэг нийгэм, соёлын салбарт Монгол улсдаа тэргүүлэн ажиллаж байна.
Хөдөлмөрийн гавьяаны улаан тугийн одонт Дархан хотынхоны бүтээлч, хөдөлмөрч хамт олны дундаас Монгол улсын Хөдөлмөрийн баатар 17, Гавьяат цолтон 50, Төрийн соёрхолт зургааг төрүүлсэн нь Та бидний зүй ёсны бахархал болж байдаг билээ.
Хотын маань нэр хүнд Монгол улсад төдийгүй гадаадын олон оронд найрамдал хамтын ажиллагаа, ах дүүгийн харилцаагаар тодорхойлогдож дэлхийд нэрлэгдэх хот болж чадлаа.
Энэ намар хотынхоо ойг угтахын зэрэгцээ ирэх дөрвөн жилд буюу 2017-2020 онд хэрэгжүүлэх аймгийн Засаг даргын үйл ажиллагааны хөтөлбөрийг аймгийн ИТХ-ын Төлөөлөгчид, иргэд ААНБ-уудынхаа хамтаар хэлэлцлээ.
Дарханы иргэдийн хэрэгцээ шаардлагад тулгуурлан хүсэл зоригийг нь эрхэмлэн дээдэлж, аймгийн эдийн засаг, нийгмийг эрчимтэй хөгжүүлэхэд төрийн бодлого, үйл ажиллагааг чиглүүлэх зорилготой нийт 8 бүлэг, 11 дэд бүлэг, 139 зорилт бүхий тус хөтөлбөрийг ИТХ-ын ээлжит бус III хуралдаанаар баталгаажуулж, хөгжил дэвшилд хүрэх замаа тодорхойллоо.
Төрийн үйлчилгээний чанар хүртээмжийг сайжруулах, иргэдийнхээ санаа бодлыг аймгийн Иргэдийн Төлөөлөгчдийн Хурал, Засаг даргаас гарах шийдвэрүүдэд тусган хэрэгжүүлэх, иргэдийн эрүүл, аюулгүй орчинд амьдрах нөхцлийг бүрдүүлэх ажлуудад томоохон ахиц гаргахын төлөө хичээн ажиллах болно.Хөгжил дэвшлийн шинэ үйлчилгээт хотыг хамтдаа бүтээлцэхэд иргэд Та бүхний оролцоо, санал санаачилгад тулгуурласан оновчтой шийдвэр, хамтын ажиллагаа чухал юм.Хот байгуулалтын нөр их хөдөлмөрч уламжлалыг өвлөн үргэлжлүүлж, ард түмнийхээ сайн сайхан амьдралын төлөө хамтдаа ажиллаж, урагшлан хөгжицгөөе.
Төрөлх хотынхоо хөгжлийн түүхийг бичилцэж буй хотын иргэд Та бүхэндээ эрүүл энх, аз жаргал, урт удаан наслахын өлзийтэй ерөөлийг дахин дэвшүүлье.
ДАРХАН ХОТ МААНЬ ҮЕИЙН ҮЕД ЦЭЦЭГЛЭН ХӨГЖИХ БОЛТУГАЙ.
Дархан-Уул аймгийн Засаг дарга С.Насанбат