Эх орны хоёр дахь нийслэлийн иргэд, Эрхэмсэг Дарханчууд та бүхэндээ Бурхантын буурал хөндийд сүндэрлэн боссон идэр залуухан хотынхоо түүхт 55 жилийн ойн баярын мэндчилгээг хүргэж, энх тунх байж, эрч хүч, эрдэм чадал дүүрэн амьдрахын эрхэм ерөөлийг өргөн дэвшүүлье.
Монгол орны аж үйлдвэрийн томоохон төв Дархан хотын анхны суурийг тухайн үеийн Давхрын төмөр замын өртөө, барилгын түүхий эдийн ордуудыг түшиглэн байгуулсан түүхтэй. Монгол Зөвлөлтийн геологичидийн хийсэн судалгаанд суурилсан тухайн үеийн Нам, Засгийн бодлого төлөвлөгөөний дагуу шинэ хотыг байгуулах шийдвэр гарч, Монголын нийгэм эдийн засгийн амьдралд томоохон өөрчлөлтийг авчирах их бүтээн байгуулалт өрнөсөн байдаг.
1961 оны эхээр Зөвлөлтийн мэргэжилтнүүд Бурхантын хөндийд ирж, Монгол орны 4 зүг найман зовхисоос залуус илгээлт өвөрлөн цугласнаар энэ сайхан хотын шав тавигдаж хөдөлмөр бүтээл ундарсан юм. Мөн эдийн засгийн харилцан туслалцах зөвлөлийн гишүүн орнууд болох ЗХУ, Болгар, Польш, Унгар, Чехословак, Герман зэрэг улсуудын техник, эдийн засгийн хамтын ажиллагааны тусламжтайгаар Дархан хотыг байгуулан хөгжүүлсэн билээ. Тиймээс ч зургаан орны залуусын хүч хөдөлмөр, сэтгэл зүтгэлээр боссон манай хотыг “Найрамдалын Дархан” гэж алдаршуулан нэрлэдэг.
Эдүгээ манай хот 97,500 гаруй хүн амтай болж, олон улсын авто болон төмөр замын зангилаан дээр байрлан, төвийн эрчим хүчний системд холбогдсон, дэд бүтэц өндөр хөгжсөн, аж үйлдвэрийн томоохон төв болон өргөжөөд байна. Хүн ам нь соёлжин боловсорч аль ч цаг үед Монголдоо төдийгүй Олон улсын түвшинд жишиг болсон өндөр чадамж бүхий иргэдтэй хот болон хөгжөөд байна. Мөн дэлхийн улс орнуудтай ах дүү найрамдалт хамтын ажиллагаагаа бэхжүүлэн ажилласаар ирлээ. Энэ бүх ололт амжилт бол манай Дарханыг дархалсан анхдагчид, үе үеийн Дарханчуудын маань түүхэн гавъяа юм. Энэ мөчид өнөөдрийн энэ амжилт бидэнд амархан олдоогүй, өвөл зуны 40-50 хэм, хавар намрын их тоосон дундаас олон мянган залуусын хөдөлмөр зүтгэлээр манай Дархан хот ургаж боссон юм гэдгийг хойч үедээ тодруулан хэлэхийг хүсэж байна.
Дарханчууд бидний цаашдын алсын зорилго бол хүний хөгжилд тулгуурлан нийгэм, эдийн засгийг эрчимтэй хөгжүүлж, хүн амын амьдралын түвшинг тууштай дээшлүүлэх, дэлхийн зах зээлд өрсөлдөх чадвартай, өндөр технологид суурилсан боловсруулах үйлдвэрлэлтэй, тэргүүлэх чиглэл бүхий Төвийн бүсийн хөгжлийн тулгуур хот болоход оршдог.
Манай Дархан хотын 55 жилийн ой бол Монгол Улсын нийгэм эдийн засгийн амьдралд дахь дэвшил, аж үйлдвэрийн салбар болон бүтээн байгуулалт эх орон даяар өрнөж ар араасаа сүндэрлэн боссон Эрдэнэт, Багануур, Налайх зэрэг олон хот тосгодын түүх гэж хэлэх бүрэн үндэстэй. Манай хот түүхий эд, материалаар хэрэгцээт газруудыг ханган хамтдаа бүтээлцэж, залуу халуун насаа зориулан зүтгэсэн 6 орны залуусын найрамдалт нөхөрлөлийн бэлэг тэмдэг, мөнхөд дурсагдах хөшөө дурсгал болон сүндэрлэдэг.
Дархан хот үүсэн байгуулагдсаны 55 жилийн ойн баяр бол анхдагчдын эхлүүлсэн их ажил, дунд үеийнхний мөрлөн зүтгэсэн хүч хөдөлмөр, залуу үеийнхний цэцэглүүлэн хөгжүүлэх үйл хэрэг, алдар гавъяаг дурсан тэмдэглэх баяр юм. Нийт Дарханчууддаа түүхт 55 жилийн ойн баярын мэндийг дахин дэвшүүлж бахархал болсон хотынхоо хөгжил цэцэглэлт ирээдүйн төлөө хамтдаа хүчин зүтгэхийг уриалж байна.
НАЙРАМДАЛЫН ХОТ ХЭМЭЭН АЛДАРШСАН ДАРХАН ХОТ МААНЬ ӨНӨ МӨНХӨД ХӨГЖИН ЦЭЦЭГЛЭХ БОЛТУГАЙ!