УИХ-ын гишүүн Н.Учрал, О.Баасанхүү тэргүүтэй УИХ дахь Нийгмийн бодлого боловсрол, соёл шинжлэх ухааны байнгын хорооны гишүүд болон БСШУСЯ-ны төлөөллүүдээс бүрдсэн ажлын хэсэг өнөөдөр /2016.09.29/ Дархан уул аймагт ажиллалаа. Ажлын хэсэг хөгжлийн бэрхшээлтэй иргэний нийгмийн хамгааллын тухай хуулийн хэрэгжилт болон ХБХүүхдүүдийн нийгмийн хамгаалал, боловсролд тулгамдаж байгаа асуудлуудтай танилцаж байгаа юм.Энэ хүрээнд ажлын хэсэг 7 дугаар цэцэрлэгийн тусгай хэрэгцээт боловсрол олгох “Тэмүүлэл-1” бүлгийн үйл ажиллагаатай танилцаж, тулгамдаж буй асуудлуудыг хэлэлцлээ.
Тус бүлгийг 2015-2016 оны хичээлийн жилд хөнгөн хэлбэрийн хөгжлийн бэрхшээлтэй хүүхдүүдэд зориулсан тусгай хэрэгцээт боловсрол олгохоор “JCI найрамдал” салбарын туслалцаатайгаар нээж 2-5 насны 12 хүүхдийг хамруулаад байна. Өнгөрсөн хугацаанд эдгээр хүүхдүүдийн бие болон оюуны хөгжил сайжирч, эцэг эхчүүд нь ч ажил хийж, амьдрал ахуйгаа дээшлүүлэх боломж бий болсон юм.
Аймгийн хэмжээнд цэцэрлэгийн насны хөгжийн бэрхшээлтэй 56 хүүхэд байдаг гэсэн судалгаа бий. Тиймээс тусгай хэрэгцээт боловсролд хамрагдах шаардлагатай хүүхдүүд байгаа учраас үйл ажиллагаагаа сайжруулах өргөтгөх чиглэлээр “Тэмүүлэл-2” бүлгийг БНТУ-ынТуркийн хамтын ажиллагаа, зохицуулах нийгэмлэгийн /ТИКА/ 100 сая төгрөгийн буцалтгүй тусламжаар 7 дугаар цэцэрлэгийн агуулахын хоёр өрөөг засварлан “Тэмүүлэл-2” бүлэг болон Сэргээн заслын төвийг нээхээр болоод байгаа юм. Дээрх засварын ажил 10 дугаар сарын 14-ний өдөр дуусч бүлгийн байрны асуудал шидэгдэж байна. Гэсэн ч тусгай мэргэжлийн багш, сэргээн засах төвийн багшийг бэлтгэх, тэдний цалин, хүүхдүүдийн эмчилгээний зардал зэргийг төсөвт суулгахад анхаарч өгөхийг хүссэн. Ажлын хэсгийн зүгээс энэ асуудлыг анхааралдаа авч холбогдох яамдад нь тавьж шийдвэрлэхээ мэдэгдсэн юм.
М.ГҮНЖИЛХАМ