Дархан суманд “Нээлттэй хаалганы өдөр”-ийг Дархан-50 цогцолбор, Цэнгэлдэх хүрээлэнд гэсэн хоёр газарт зохион байгуулж, аймаг, Дархан сумын бүх төрийн байгууллагууд оролцлоо. Тус сум нь 18 багаар дамжуулан 80 гаруй мянган иргэдэд төрийн үйлчилгээг үзүүлдэг байна. Энэ өдөр иргэдэд Эрүүл мэндийн анхан шатны үзлэг, Иргэний шинэчилсэн бүртгэл хийх, Иргэний цахим үнэмлэх дахин авах хүсэлт хүлээн авах, Гадаад паспорт сунгах болон шинээр авах иргэдийн материал хүлээн авах, Хүүхэд хамгааллын зөвлөгөө өгөх, Дулаан болон цэвэр бохир усны гэрээ хийх төлбөр тооцоо барагдуулах зэрэг төрийн бүхий л үйлчилгээг нэг дороос цогцоор нь үзүүлсэн юм.
Мөн үеэр аймаг, сумдын Засаг дарга нар үйл ажиллагааны хөтөлбөрийн хэрэгжилтээ иргэдэд тайлагнах хуулийн хүрээнд Дархан-Уул аймаг, Дархан сумны Засаг даргын 2013-2016 оны үйл ажиллагааны хөтөлбөрийн хэрэгжилтийн явцын тайланг иргэдэд хүргэлээ.
Энэ онд Дархан суманд “Орон нутгийн хөгжлийн сан”-гийн 1 тэрбум 700 гаруй сая төгрөгийн хөрөнгө оруулалтаар 17 ажил хийгдэхээр төлөвлөгджээ. Эдгээр ажлуудаас дурдвал өнөөдрийн /2016.09.19/ байдлаар Дархан сумын 8, 11, 13, 14, 15, 16 дугаар багуудад хүүхдийн тоглоомын талбайн ажил хийгдэж байна. Мөн Дархан сумын 7 дугаар багийн Зурагтын 8 дугаар худгийн дэргэд сагсан бөмбөгийн талбай, хангамжийн 6 дугаар худаг, Майхантын 1 дүгээр худгийн хажууд тус тус нэг сүүдрэвчийг хийсэн бол оршин суугчдынх нь хүсэлтээр тус сумын 5 дугаар багийн 20-2 дугаар байрны өмнө 24 авто машины зогсоолыг Хөдөлмөрийн хэлтэстэй хамтран байгуулсан байна. Үүнээс гадна Дархан сумын 5, 6 дугаар багт НҮБ-ын МОН 13/301 төсөл гурван жилийн хугацаанд амжилттай хэрэгжиж дуусчээ.
Энэ жил Дархан хотын 55 жилийг ой тохиож буй тул 10 сарын 17-ны өдрөөс урьтаж зам засварын ажлуудыг дуусгахаар ажиллаж байгаа бөгөөд өнөөдрийн байдлаар гүйцэтгэл 70 орчим хувьтай явагдаж байна. Намрын шаргал өдрүүд улирч хүйтний улирал хаяанд ирж байна. Тиймээс Дархан сумын Өвөлжилтийн бэлтгэл ажил 80 гаруй хувьтай өрнөж байгаа ажээ. Нийтийн орон сууцнуудын айл өрхүүд энэ сарын 15-ны өдрөөс дулаанаа авсан бол гэр хорооллын өрхүүдэд “Шарын гол” ХК чанартай, үнийн хувьд боломжийн нүүрсийг нийлүүлэхээр Дархан сумын ЗДТГ-тай гэрээ хийсэн байна. Мөн 15 дугаар багийн 2160 өрхөд “НАКО ТҮЛШ” ХК эко түлшийг түүхий нүүрсний үнээр нийлүүлэхээр болсон талаар тус сумын ЗДТГ-аас мэдээллээ.
М.Гүнжилхам