Нийгэм, гэр бүлийн орчинд хүүхдийн эрх хамгааллыг бэхжүүлэхэд тулгарч буй асуудлыг тэдний оролцоонд нь тулгуурлан гаргах, хамтран шийдвэрлэх зорилготой “Хүүхдийн эрх хамгаалал-Хүүхдийн оролцоо” сэдэвт хүүхдийн хоёрдугаар чуулганыг Баянзүрх дүүргийн Засаг даргын Тамгын газар, дүүргийн Хүүхэд, гэр бүл хөгжлийн төв, “Дэлхийн зөн” Олон Улсын байгууллага хамтран өнөөдөр Олон улсын хүүхдийн Найрамдал төвд зохион байгууллаа. Чуулганд дүүргийн Засаг дарга Д.Пүрэвдаваа, Хөдөлмөр эрхлэлт, нийгмийн хөгжлийн асуудал хариуцсан Засаг даргын орлогч Б.Баясах, Нийслэлийн Хүүхэд гэр бүл хөгжлийн газрын дарга Я.Байгалмаа, дүүргийн Хүүхэд, гэр бүл хөгжлийн төвийн дарга Б.Өлзий-Орших, Гэр бүл судлаач, багш, докторТ.Намжил, Сурагчдын холбооны тэргүүн О.Сэлэнгэ болон Ерөнхий боловсролын сургуулиудын 100 гаруй сурагч, албаны бусад хүмүүс тус чуулганд оролцлоо.
Дүүргийн Засаг дарга Д.Пүрэвдаваа чуулганыг нээсэн бөгөөд “Баянзүрх дүүрэг 0-18 насны 104 мянган хүүхэдтэй. Энэ нь нийт хүн амын 32 хувийг эзэлж байна. Дүүргийн зүгээс 2013-2015 онд Хүүхэд хамгааллын чиглэлээр 57, хөгжлийн чиглэлээр 28 нийт 85 үйл ажиллагааг зохион байгуулж давхардсан тоогоор 103 мянган иргэнийг хамруулаад байна. Хүүхэд харах үйлчилгээний хуулийн хэрэгжилтийг хангах ажлын хүрээнд 165 иргэнийг ажлын байртай болгож 64 төв үйл ажиллагаагаа эхлэхэд бэлэн болоод байна. Хүүхдийн өмнө хүлээх хариуцлагыг нэмэгдүүлэх, хариуцлагын тогтолцоог бий болгох, хөрөнгө оруулалтыг нэмэгдүүлэхэд та бидний оролцоо маш чухал үүрэгтэй” хэмээн онцолсон юм. Дашрамд дурдахад “Хүүхдэд ээлтэй орчин-Хүүхдийн оролцоо” сэдэвт анхдугаар чуулганыг 2014 онд зохион байгуулж байсан бөгөөд чуулганд оролцсон хүүхдүүдийн зөвлөмжинд тулгуурлан олон ажлыг хийжээ. Тухайлбал, гэмт хэрэгт өртсөн хүүхэдтэй ажиллах дүүргийн хүүхдийн Хууль зүйн хороог байгуулж, 20 хүүхдийн ялыг хойшлуулсан байна.
Мөн хүүхдийн санаа бодлыг сонсох, хүүхдэд шаардлагатай сэтгэл зүйн зөвлөгөө өгөх, мэдээллээр хангах, сэтгэцийн эрүүл мэндэд эрсдэлтэй тохиолдолд яаралтай тусламж үйлчилгээ үзүүлэх зорилгоор Хүүхдийн тусламжийн утас 108 төвыг байгуулжээ. Уг төв 2014- 2016 онд 162 дуудлага хүлээн авч, 128 дуудлагыг хааж, 14 дуудлагыг шилжүүлж, 20 дуудлага шийдвэрлэх шатандаа явж байгаа аж.