Байгаль орчин, Ногоон хөгжил, Аялал жуулчлалын сайд Н.Батцэрэг Нэгдсэн Үндэсний Байгууллагын Байгаль Орчны Хөтөлбөрийн Газрын ерөнхий нарийн бичгийн дарга Аким Штайнертай 2015 оны 12-р сарын 10-ны өдөр Бүгд Найрамдах Франц Улсын нийслэл Парис хотноо болж буй НҮБ-ын Уур амьсгалын өөрчлөлтийн асуудлаарх суурь конвенцийн талуудын 21 дүгээр бага хурлын үеэр уулзав.
Уулзалтын үеэр Н.Батцэрэг сайд үгэндээ: Монгол Улсын Засгийн Газар Нэгдсэн Үндэсний Байгууллагын Байгаль Орчны Хөтөлбөртэй хамтын ажиллагаагааны олон чиглэлээр өргөжүүлэн амжилттай ажиллахыг цаг ямагт эрмэлздэгээ дурдан Монгол улс “Ногоон эдийн засгийн төлөөх түншлэл” (PAGE) хөтөлбөрт үргэлжлүүлэн хамрагдах хүсэлтэй буйгаа илэрхийлэхийн сацуу тус хөтөлбөрийг “Хятадын байгаль орчин, хөгжлийн олон улсын хамтын ажиллагааны зөвлөл”-ийн үйл ажиллагаатай ижил төстэй хэлбэрээр хэрэгжүүлэх боломжтой гэсэн саналыг дэвшүүлсэн.
Үүний дараа Нэгдсэн Үндэсний Байгууллагын Байгаль Орчны Хөтөлбөрийн Газрын ерөнхий нарийн бичгийн дарга Аким Штайнер: Монгол Улсын Байгаль орчин, Ногоон хөгжил, Аялал жуулчлалын яам, Нэгдсэн Үндэсний Байгууллагын Байгаль Орчны Хөтөлбөрийн Газрын хоорондын хамтын ажиллагаа улам өргөжин хөгжиж байгаад баяртай буйгаа дурдсан юм. Ногоон эдийн засаг, тогтвортой ногоон санхүүжилтийг санхүүжүүлэх үйл ажиллагаанд Монгол улс идэвхитэй оролцож байна. 2016 оноос “Ногоон эдийн засгийн төлөөх түншлэл” (PAGE) хөтөлбөрийн цар хүрээг өргөжүүлэх хүсэлтийг дэмжихээ илэрхийлсэн. Мөн “Монгол улсын байгаль орчин, хөгжлийн олон улсын хамтын ажиллагааны зөвлөл” байгуулах саналыг дэмжих боломжтой хэмээн үзэж байна. Монгол улсаас цаашид хэрэгжүүлэхээр төлөвлөж буй санал, санаачилгуудыг хамтран амжилттай хэрэгжүүлнэ гэдэгт итгэж буйгаа онцлон тэмдэглэв.
2016 оны 05 дугаар сард зохион байгуулагдахаар төлөвлөгдөж буй Нэгдсэн Үндэсний Байгууллагын Байгаль орчны ассамблейд Байгаль орчин, Ногоон хөгжил, Аялал жуулчлалын сайд Н. Батцэрэгийг оролцохыг урилаа.
Франц улс, Парис хот