БОНХАЖЯ нь Ногоон хөгжлийн бодлогыг хэрэгжүүлэх үйл ажиллагааны төлөвлөгөө (2014-2030)-г боловсруулж, Архангай, Ховд, Өвөрхангай, Булган, Хэнтий аймгийг ногоон хөгжлийн загвар аймаг болгохоор шийдвэрлэсэн. Түүнчлэн ногоон хөгжлийг дэмжих чиглэлээр Улаанбаатар хотын ногоон хөгжлийн стратегийн төлөвлөгөөг боловсруулах ажил хийгдэж байна.
Эдгээр үйл ажиллагаа, санаачлагыг дэмжин, бодлого боловсруулагч, шийдвэр гаргагч нарт ногоон хөгжлийн үндсэн суурь ойлголт, олон улсын туршлагын талаар мэдлэг, мэдээлэл түгээх, Монгол улсын боломж, сорилтын талаар хэлэлцэх сургалтыг зохион байгуулах шаардлагатай юм. Тиймээс БОНХАЖЯ, Ногоон эдийн засгийн төлөөх түншлэлтэй хамтран яамд, тэдгээрийн харъяа агентлаг, НЗДТГ, төрийн байгууллагуудын бодлого, шийдвэр гаргагч, мэргэжилтэн нарт зориулан “Ногоон эдийн засгийн үндэс” сургалтыг 2015 оны 11 дүгээр сарын 19-ний өдөр Улаанбаатар хотноо амжилттай зохион байгууллаа. Сургалтыг БОНХАЖЯ-ны Төрийн нарийн бичгийн дарга Ц.Цэнгэл нээсэн бөгөөд холбогдох сэдвийн дагуу илтгэл, хэлэлцүүлгийг явууллаа.
Сургалтыг бодлого, шийдвэр гаргагч, төрийн захиргааны төв болон орон нутгийн байгууллага, агентлагуудад ажилладаг мэргэжилтэн нарт тогтвортой хөгжил, ногоон эдийн засгийн үзэл баримтлал, суурь зарчмуудыг таниулах, ногоон хөгжилд хүрэх Монгол улсын боломж, сорилт, олон улсын туршлагын талаар мэдлэг олгох, мэдээлэл түгээх, улмаар яамд хоорондын хамтын ажиллагааг хангах, бодлого, төлөвлөлт, үйл ажиллагааны уялдаа холбоо, зохицуулалтыг сайжруулах зорилгоор зохион байгуулсан юм.
Энэ нь ногоон хөгжлийн бодлогыг үндэсний хөгжлийн бодлоготой уялдуулан хүрээлэн буй орчны тогтвортой байдлыг хангасан эдийн засгийн өсөлтийг бий болгох зорилго бүхий үйл ажиллагааг бусад салбарын бодлого, төлөвлөгөөтэй уялдуулахад бодитой хувь нэмэр оруулна хэмээн үзэж байна.
Энэхүү сургалтад:
- Яамд, түүний харъяа агентлаг, төрийн байгууллагуудын стратеги, бодлого төлөвлөлт эрхэлсэн газар, хэлтсийн удирдлага, албан хаагчид,
- Нийслэлийн Засаг даргын тамгын газар, түүний харъяа байгууллагуудын хөгжлийн бодлого, төлөвлөлт эрхэлсэн газар, хэлтсийн удирдлага, ажилтан, албан хаагчид,
- БОНХАЖЯ-ны нийт газар, хэлтэс болон яамны харъяа агентлагуудын удирдлага, албан хаагчид хамрагдсан юм.
Сургалт үндсэн дөрвөн хэсгээс бүрдсэн бөгөөд
- Тогтвортой хөгжлийн зорилт,
- Монгол улсын ногоон хөгжлийн бодлого, үйл ажиллагааны төлөвлөгөө,
- Ногоон эдийн засгийн үзүүлэлт, ногоон эдийн засгийн хөшүүрэг, арга хэрэгсэл,
- Эдийн засгийн гол салбаруудыг байгаль орчинд ээлтэй,“ногоон” болгох арга зам, тогтвортой хэрэглээ, амьдралын хэв маяг болон ногоон эдийн засгийн боловсролын стратегийн асуудлууд гэсэн 4 хэсгээс бүрдсэн юм.
"ПУМА ИМПЕРИАЛ" Зочид буудлын хурлын танхим 2015 оны 11 дүгээр сарын 19-ний өдөр 9 цаг 00 минут