Шанхайн хамтын ажиллагааны байгууллага /ШХАБ/-ын гишүүн орнуудын Тээврийн сайд нарын 7 дугаар уулзалт 2015 оны 5 дугаар сарын 14-15-ны өдрүүдэд ОХУ-ын Уфа хотноо зохион байгуулагдав. Энэхүү уулзалтад ШХАБ-ын гишүүн 6, ШХАБ-ын ажиглагч 5, Беларусь, Турк зэрэг яриа хэлэлцээний түнш орнуудын Тээврийн сайд нар болон АСЕМ, АНДЭЗНК-ын төлөөлөгчид оролцов.
Монгол Улс 2004 оноос хойш ШХАБ-ын ажиглагч улсын оролцоотой байж ирсэн. Монгол Улсыг төлөөлж Зам, тээврийн сайд Н.Төмөрхүү ШХАБ-ын гишүүн орнуудын Тээврийн сайд нарын 7 дугаар уулзалтад анх удаагаа оролцов.
Энэхүү уулзалтаар ШХАБ-ын гишүүн болон ажиглагч орнууд хоорондын тээврийн сүлжээг харилцан уялдаатай хөгжүүлэх, тээврийг хөнгөвчлөх, тээврийн салбарын дэд бүтэц болон төмөр замын үйл ажиллагааны хамтарсан төслүүдийг хөгжүүлэх, тээврийн салбарын аюулгүй байдлыг хангаж, шинэ дэвшилтэт технологи болон ухаалаг тээврийн системыг нэвтрүүлэх зэрэг асуудлуудын талаар хэлэлцсэн. Талын зам төслийн хүрээнд Сайд Н.Төмөрхүү Монгол улсын авто зам, төмөр замын дамжин өнгөрөх коридор, бүс нутгийн тээврийн сүлжээнд Монгол улсын оролцооны талаар танилцуулав.