Аймгийн Засаг даргын 2013-2016 оны үйл ажиллагааны хөтөлбөр, аймгийн эдийн засаг-нийгмийг 2015 онд хөгжүүлэх үндсэн чиглэл, аймгийн малчин хөтөлбөр, амьдралын буруу хэвшлээс үүдэлтэй өвчнөөс сэргийлэх, хянах хөтөлбөрүүдэд хөдөөгийн малчин өрхийн хүн амд урьдчилан сэргийлэх, эрт илрүүлэх үзлэг, шинжилгээ, оношилгоог хийх, өвчлөлийн судалгааг гаргах, иргэдийн эрүүл мэндийн боловсролыг дээшлүүлэх, эрүүлжүүлэх, хянах арга хэмжээг зохион байгуулах зорилтуудыг тусган хэрэгжүүлж байна.
2014 оны жилийн эцсийн судалгаагаар зорилтот сумын хүн амын дунд малчид дунджаар 45-70%-ийг /Булган 46.2%, Мандал-овоо-43.2%, Цогт-овоо-50.6%, Ханхонгор-68.5%, Цогтцэций 5.9%, Хүрмэн-65.2%, Баяндалай-46.2%/ эзэлж байна.
Малчдын дунд явуулын үзлэгийг 5,6-р сард багтаан 7 сумын 22 багт зохион байгуулахаар аймгийн Засаг даргын 2015 оны а/262 тоот захирамж гарч, нарийн мэргэжлийн эмч нарын явуулын үзлэгийн баг эхний баг руу хөдлөхөд бэлэн болоод байна.
Энэхүү арга хэмжээг зохион байгуулах, шинжилгээний урвалж бодис авах, шатахуун, эмч нарын томилолтын зардалд орон нутгийн төсвөөс 43,2 сая төгрөгийг шийдвэрлэлээ.
Энэхүү үзлэгийн гол зорилго нь хөдөөгийн малчин өрхийн хүн амын дунд нарийн мэргэжлийн эмч нарын урьдчилан сэргийлэх, эрт илрүүлэх үзлэг, шинжилгээ, оношилгоог хийх, хүн амын өвчлөлийн судалгааг гаргах, иргэдийн эрүүл мэндийн боловсролыг дээшлүүлэх, эрүүлжүүлэх, ажлын байранд сургах үйл ажиллагааг цогцоор нь зохион байгуулж тусламж үйлчилгээний хүртээмжийг сайжруулахад оршиж байгаа.
Явуулын үзлэгийн үеэр алслагдсан нутагт амьдарч буй малчин иргэдийг нарийн мэргэжлийн эмч нарын иж бүрэн үзлэг, шинжилгээ, оношлогоонд хамруулах, эмчилгээ хийх, хяналтанд авах, эрүүл мэндийн боловсролыг дээшлүүлэх, өвчлөлийн түвшинг тогтоох, судалгаа гаргах, эрүүлжүүлэх төлөвлөгөө гарган ЭМТ-дэд хүлээлгэн өгч, эрүүлжилтийн үр дүнг тооцон хамтран ажиллах зэрэг ажлууд хийгдэх юм.
Явуулын үзлэг, шинжилгээнд хамрагдах сум, багийн Засаг дарга нар иргэддээ зар мэдээг хүргэж, хамтран ажиллах, эрүүл эндийн байгууллагууд үзлэгийн судалгааг нарийн гаргаж, эрүүлжүүлэх ажлыг зохион байгуулахыг зөвлөж байгаа.
Булган сум / Хавцгайт-5 сарын 16, Дал-5 сарын 17, Дэн-5 сарын 18/
Мандал-Овоо сум /Мандал-5 сарын 19, Өтгөн-5 сарын 20, Баянхошуу-5 сарын 21/
Цогт-овоо сум / Замын шанд-5 сарын 22, Бортээг-5 сарын 23, Найз-5 сарын 24/
2-р баг 6 сард
Ханхонгор /Мандах, Өгөөмөр, Хондот, Жаргалант/,
Цогтцэций /Өгөөмөр, Сийрст, Билгэх, Цагаан-овоо/
Хүрмэн /Хүрмэн, Жанжин, Тулга/
Баяндалай / Төхөм, Наран, Баян / суманд ажиллана
