Хүүхдийн эрүүл мэндийн талаар төрөөс баримтлах олон талт арга хэмжээг авч хэрэгжүүлж байгаагийн нэг ажил бол дархлаажуулалт бөгөөд Дархлаажуулалтын тухай хуулийг 2000 оноос хойш хэрэгжүүлж, тогтоол, шийдвэр, журмыг хэрэгжүүлэн ажиллаж байгаа билээ.
Монгол улсад гарч байсан зарим нэг халдварт өвчин дархлаажуулалтын үр дүнгээр устаж, багасч, буурсан үр дүн гарч байна. Аймгийн хэмжээнд дархлаажуулалтын ажил 99 хувьтай амжилттай хэрэгжиж байна.
Өмнөговь аймагт Эрүүл мэндийн тогтолцоог бэхжүүлэх стратегийн хүрээнд ДЭМБ-ийн санхүүжилтээр “Сум бүрт хүрч үйлчилье” дархлаажуулалтын 50 000 ам.дол-ын төслийг энэ оноос хэрэгжүүлж эхлээд байгаа юм.
Сүүлийн 2 сард улаан бурхан өвчин гарч буйтай холбогдон аймгийн Засаг даргын 2015 оны а/183 тоот захирамжийг гарган халдварт өвчний эсрэг хариу арга хэмжээ авч хэрэгжүүлж байна.
Мөн аймгийн Засаг даргын 2015 оны а/266 дугаар захирамжаар “Хүүхэд бүрийг улаан бурхан өвчний эсрэг бакцинд бүрэн хамруулья” уриан дор 05-р сарын 15-25-ний хооронд нэмэлт дархлаажуулалтын 10 хоногийн аяныг зохион байгуулж, өнөөдөр аймгийн хэмжээнд нээлтээ хийж байна.
Тус аяныг амжилттай зохион байгуулахад Эрүүл мэндийн байгууллагууд, сум, өрхийн эмнэлгүүд болон Боловсролын байгууллагууд, цэцэрлэгүүд, эцэг эхчүүд хамтран ажиллах нь чухал байна.
Мөн иргэд маань халдварт өвчнөөс сэргийлэх олон улсад жишиг болсон шилдэг арга бол вакцинжуулалт гэдгийг ойлгож, хүүхдүүдээ бүрэн хамруулахыг аймгийн нийт иргэдэд, эцэг эхчүүд, байгууллага, аж ахуйн нэгжийн ажилчид, албан хаагчдад уриалж байна.