Ерөнхий сайд Ч.Сайханбилэг Монгол, Японы бизнес эрхлэгчдийн уулзалтад үг хэллээ

Японы бараа бүтээгдэхүүнийг гадаадад таниулах, гадаад орнуудаас Японы хэрэглэгчдэд шаардлагатай импортын бүтээгдэхүүнийг судлах, тэдгээр бараа материалыг үзэсгэлэн яармаг хэлбэрээр сурталчлах, бизнесийн төлөөлөгчдийг хүлээн авах зэрэг үйл ажиллагаа явуулдаг Японы Гадаад худалдааг дэмжих байгууллага (ЖЕТРО) тус улс дахь Монголын Элчин сайдын яамтай хамтран бизнес эрхлэгчдийн ажил хэрэгч уулзалт зохион байгууллаа.

Энэхүү арга хэмжээнд 150 хүн оролцохоор бүртгүүлсэн ч 200 гаруй бизнес эрхлэгч оролцож буй нь хоёр орны халуун дотно харилцааны илэрхийлэл гэж дүгнэх хүн олон байлаа.

Тус улсад ажлын айлчлал хийж буй Монгол Улсын Ерөнхий сайд Ч.Сайханбилэг энэ уулзалтад оролцож, Японы бизнес эрхлэгчидтэй уулзах боломж олгосон, уулзалтыг зохион байгуулсан хүмүүст, Монголд хөрөнгө оруулалт хийхээр сонирхож буй бизнес эрхлэгчдэд талархаж байгаагаа хэлээд, дэмжиж ажиллахаа илэрхийллээ.

Монгол Улсын Засгийн газар улс төр болон бизнесийн тогтвортой байдлыг хангахын төлөө ажиллаж байна. Монгол Улс Япон улстай Эдийн засгийн түншлэлийн хэлэлцээрт өнөөдөр гарын үсэг зурна. Энэхүү хэлэлцээр нь хоёр орны бизнес эрхлэгчдэд таатай боломж олгох болно. Бизнес эрхлэх, гадаадын хөрөнгө оруулалтыг нэмэгдүүлэх эрх зүйн орчныг сайжруулах чиглэлд Засгийн газар ажиллаж байгаа гэлээ.

  Монголын уул уурхай, цахилгаан станц, төмөр зам барих, төмөрлөг, ган, зэс хайлуулах үйлдвэр байгуулах, хурдны зам, метро барих зэрэг томоохон төслүүд шинэ хөрөнгө оруулагчаа хүлээж байна. Төрийн өндөр дээд түвшний айлчлалууд тогтмолжиж, хоёр орны улстөрийн харилцаа сайн хөгжлөө. Иргэд хоорондын харилцаа ч өндөр хэмжээнд хөгжиж байна. Энэ харилцаагаа бид өнөөдөр эдийн засаг, худалдааны салбарт ашиглах цаг иржээ гэж Ерөнхий сайд хэллээ.

Энэ уулзалтын үеэр Уул уурхайн сайд Р.Жигжид, Монгол банкны Ерөнхийлөгч Н.Золжаргал, Ерөнхий сайдын зөвлөх О.Чулуунбат нар илтгэл тавьж, асуулт хариулт өрнөлөө.

Ерөнхий сайд Ч.Сайханбилэгт энэ үеэр Японы Гадаад худалдааг дэмжих байгууллага (JETRO)-ын Ерөнхийлөгч Х.Ишигэ бараалхсан юм. JETRO манай улсад төлөөлөгчийн газраа байгуулж, хамтын ажиллагаагаа улам идэвхжүүлнэ гэдэгт найдаж байна гэж уулзалтын үеэр Ерөнхий сайд хэллээ.

Тус байгууллагын төв контор нь Токио болон Осака хотод байрладаг бөгөөд орон нутагтаа 40 салбартай, гадаадын 55 оронд 73 төлөөлөгчийн газартай, 1500 гаруй ажилтан, албан хаагчтай ажээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.