2014 оны 12 дугаар сарын 24-ний өдрийн 10.00 цагийн байдлаар:
МОНГОЛ УЛСАД:
Нийслэлийн агаар “Дунд” зэргийн бохирдолтой байна
12 дугаар сарын 15-наас 21-ний хооронд нийслэлийн агаарын чанарын хяналт шинжилгээний дүнгээр Улаанбаатар хотын гэр хороолол төвлөрсөн орчимд агаар “Их”,“Дунд” зэргийн бохирдолтой, бусад хэсгээр “Бага” болон “Дунд” зэргийн бохирдолтой байна.
Эх сурвалж: Агаарын чанарын алба
Архины хордлогын улмаас 178 хүн эмнэлэгт ханджээ
Нийслэлийн хэмжээнд 2014 оны 12 дугаар сарын 16-наас 23-ны хооронд 178 хүн архины хордлогын улмаас эрүүл мэндийн байгууллагад хандсанаас 20 хүн хэвтэн эмчлэгдсэн байна. Энэ нь өмнөх долоо хоногийн үзүүлэлтээс 3.7 хувиар буурчээ.
ДЭЛХИЙ ДАХИНД:
АНУ-д “Bourbon” хэмээх шинэ вирус илэрчээ
АНУ-ын Bourbon мужийн нэгэн оршин суугч шинэ вирусын халдвар авч өвчилсөн тухай АНУ-ын Өвчний хяналт, сэргийлэлтийн төв болон Кансасын Эрүүл мэнд, орчны хүрээлэнгийн судлаачид хамтран илрүүлсэн байна.
Тус вирус нь хүнд хэрхэн дамждаг нь одоогоор тодорхой бус байгаа бөгөөд мэргэжилтнүүд хачиг болон шавжаар дамждаг байж болзошгүй гэж үзэж байна. Bourbon мужийн иргэн өвчилсөн учраас уг вирусыг “Bourbon” гэж нэрлэжээ.
Эх сурвалж: http://www.kdheks.gov/news/web_archives/2014/
www.promedmail.com
Эбола вируст халдвараар нас барах хүмүүсийн тоо нэмэгдсээр байна
2014 оны 12 дугаар сарын 17-ны байдлаар дэлхийн 9 улсад эбола вируст халдвараар 18669 хүн өвчилж, 6964(37%) хүн нас барсан байна. 12 дугаар сарын 10-наас хойш өвчний 661 шинэ тохиолдол бүртгэгдсэн бол нас баралт 527 хүнээр нэмэгджээ.
Эрүүл мэндийн 649 ажилтан уг халдвараар өвчилж, 56% (365) нь нас барсан нь өмнөх мэдээллээс хойш 27 хүнээр нэмэгдсэн байна.
12 дугаар сарын 23-ны өдрийн байдлаар эрчимтэй тархалттай (Гвиней, Либери, Сьерра-Леон) улсуудад 19431 хүн өвчилж, 7565 хүн нас барсан нь өнгөрсөн ням гарагын мэдээнээс хойш 91 шинэ тохиолдол, нас баралт 47 хүнээр тус тус нэмэгдсэн байна.
Эх сурвалж: ДЭМБ
Шуурхай удирдлагын төв