Өвөрхангай аймгийн Бат-Өлзий сумын эрүүл мэндийн төв магадлан итгэмжлэлийн шалгуур үзүүлэлтийг хангаж, 94,8 хувьтай үнэлэгдсэнээр “Загвар эрүүл мэндийн төв”-ийн батламжаа гардан авлаа.
“Загвар эрүүл мэндийн төв”-ийн батламж гардуулах ёслолын ажиллагаа Бат-Өлзий сумын эрүүл мэндийн төвд болж, тус арга хэмжэнд ЭМЯ-ны Эмнэлгийн тусламжийн хэлтсийн анхан шатны тусламжийн бодлого зохицуулалт хариуцсан мэргэжилтэн Р.Байгалмаа, Эрүүл мэндийн хөгжлийн төвийн дарга Ч.Бат-Эрдэнэ, аймгийн Засаг дарга Д.Тогтохсүрэн, Нийгмийн хөгжлийн хэлтсийн дарга Б.Мөнхжаргал болон аймгийн Иргэдийн хурлын төлөөлөгчид, сумдын Засаг дарга, ЭМТ-ийн дарга зэрэг нийт 80 гаруй албаны хүн оролцлоо.
Арга хэмжээний үеэр Эрүүл мэндийн газрын дарга Ч.Сэрчмаа “Сумын эрүүл мэндийн төвийг магадлан итгэмжлэлийн шалгуурыг хангасан загвар эрүүл мэндийн төв болгон хөгжүүлэх нь”, Хайрхандулаан сумын ЭМТ-ийн дарга М.Батжаргал “Сумын эрүүл мэндийн төвийг хөгжүүлэхэд орон нутгийн дэмжлэг туслалцаа, үр дүн”, Бат-Өлзий сумын ЭМТ-ийн дарга Г.Дашжанцан “Магадлан итгэмжлэлийн шалгуурыг хангасан загвар сумын ЭМТ-ийн танилцуулга” илтгэлийг тус тус хэлэлцүүлж, үзүүлэх сургуулилтыг зохион байгуулав.
Тус арга хэмжээний хүрээнд “Сумын эрүүл мэндийн төвийг хөгжүүлэхэд салбар хоорондын оролцоо” хэлэлцүүлгийг зохион байгуулж, тулгамдаж буй асуудлаа тодорхойлсон нь ач холбогдолтой үйл ажиллагаа болсон юм.
Энэхүү арга хэмжээний үеэр аймгийн ИТХ, Засаг дарга, ЭМГ-аас Магадлан итгэмжлэлийн шалгуурыг хангахад идэвхи, санаачлагатай ажилласан эмч, мэргэжилтэн, ажилтнуудыг шагнаж, урамшуулсан.
“Загвар эрүүл мэндийн төв”-ийг бий болгосноор тусламж, үйлчилгээ үзүүлэх ээлтэй орчин бүрдэж, эмнэлгийн тусламж үйлчилгээний чанар хүртээмжийг сайжруулахад ач холбогдлоо өгөх, бусад эрүүл мэндийн төвүүдэд сайн туршлага болохуйц ажил боллоо.
Цаашид аймгийн удирдлага, ЭМГ-аас бүх сумдын эрүүл мэндийн төвийг шат дараатай загвар эрүүл мэндийн төв болгон хөгжүүлэх зорилт тавин ажиллаж байна.
