Замын-Үүд боомт дахь Хилийн мэргэжлийн хяналтын албанаас ДЭМБ-ын санхүүжилтаар “Нийгмийн эрүүл мэндийн ноцтой байдлын бэлэн байдлын хариу арга хэмжээ” сэдэв сургалтыг 2014 оны 11 дүгээр сарын 27, 28-ны өдрүүдэд зохион байгууллаа.
Уг сургалтад ДЭМБ-ын Монгол дахь Суурин төлөөлөгч Др.Су Ньюнт-У, ДЭМБ-ын мэргэжилтэн С.Эвлэгсүрэн, ЭМЯ-ны ЭТХ-ийн ахлах мэргэжилтэн Ч.Баярмаа, ХӨСҮТ-ийн ХӨТСАлбаны дарга А.Амбасэлмаа, ХӨСҮТ-ийн зөвлөх доктор н.Цэнд, ХӨСҮТ-ийн ЭМХАХН-ийн дарга Н.Сувдмаа, ХӨСҮТ-ийн ЭШХТасгийн дарга Ж.Нямсүрэн, МХЕГ-ын ХМХГ-ын хэлтсийн дарга н.Баярхүү, МХЕГ-ын ХМХГ-ын ЭАХХХУАБ Т.Төмөрбаатар, ОБЕГ-ын мэргэжилтэн н.Хонгор, Боомтын нэгдсэн захиргааны мэргэжилтэн н.Сансартуяа, Замын-Үүд боомт ХМХА-ын дарга С.Баясгалан, Замын-Үүд боомт ХМХА-ын орлогч дарга Г.Шүрэнчулуун, Замын-Үүд Боомтын захиргааны орлогч дарга н.Батчулуун, 7 боомтын 30 улсын байцаагч, Замын-Үүд сумын хил хяналтын байгууллагын 11 албан хаагч зэрэг нийт 52 хүн хамрагдлаа.
Сургалтыг МХЕГ-ын ХМХАГ-ын ЭАХХХ-ын улсын ахлах байцаагч Т.Төмөрбаатар удирдан явуулсан бөгөөд Эрүүл мэндийн яам болон Халдварт өвчин судлалын үндэсний төвийн мэргэжилтнүүд 6 чиглэлээр хичээл заасан юм.
Мөн оролцогчдыг дөрвөн багт хувааж, “Нийгмийн эрүүл мэндийн ноцтой байдлын бэлэн байдлын хариу арга хэмжээ”-ний төслийг тохиолдлын менежментийн тогтолцоотой уялдуулан шинэ болон сэргэн тархаж байгаа халдвар, химийн болон цацрагийн хордлого, гамшиг /гал түймэр/ зэрэг нийгмийн эрүүл мэндийн ноцтой байдлын төрлөөр боловсруулан дадлага хийлгэлээ.
Сургалтын хоёр дахь өдөр Замын-Үүд боомтын Автозамын шалган нэвтрүүлэх боомт дээр халдварт өвчний сэжигтэй тохиолдол илрэх үеийн хариу арга хэмжээний бэлэн байдлын үзүүлэх сургуулилтыг амжилттай зохион байгууллаа.
Замын-Үүд боомтод ачааны болон суудлын автомашины хил нэвтрэх 2 зам дээр тээврийн хэрэгслийн халдваргүйжүүлэлтийг туулуулах, шүрших аргаар хийж гүйцэтгэдэг байна.
Монгол улсад импортлогдож байгаа бараа бүтээгдэхүүний 70 хувь нь тус боомтоор нэвтэрдэг бөгөөд боомтын автозамаар өдөртөө 150-200 ачааны автомашин, 400-700 суудлын автомашин, 3000-4500 зорчигч нэвтэрдэг.
Авто замын боомтоор 10 хяналтын терминалд 08-18 цаг хүртэл, Төмөр замын боомтын 4 хяналтын терминалд 24 цагаар хяналт шалгалтын үйл ажиллагааг гүйцэтгэж байгаа ажээ.
Замын-Үүд боомт дахь Хилийн мэргэжлийн хяналтын алба нь Олон улсын хүний хөл хориот болон мал, амьтны Олон Улсад шуурхай, тогтмол мэдээлэх халдварт өвчин, ургамлын хорио цээртэй өвчин, хөнөөлт шавьж, мэрэгч амьтан, хог ургамал улсын хилээр нэвтрэх, бусад улс оронд дамжин тархахаас урьдчилан сэргийлэх, импорт, экспортын бараа, бүтээгдэхүүний аюулгүй байдлыг хангуулах үндсэн зорилгоор Эрүүл ахуй халдвар хамгааллын хяналт, Мал эмнэлгийн хяналт, Ургамал хамгаалал хорио цээрийн хяналт, Хүнсний чанар аюулгүй байдлын хяналт, Химийн хорт болон аюултай бодисын хяналтыг хийдэг байна.
