Улсын Онцгой Комиссын даргын 2014 оны 10 дугаар сарын 21-ний өдрийн 3 дугаар тушаал, 2 дугаар албан даалгавар, үндэсний аюулгүй байдлын зөвлөлийн 45/25 дугаар зөвлөмжийн дагуу Эбола вируст халдвараас сэргийлэх, бэлэн байдлыг хангах ажлын хэсгийг Эрүүл мэндийн сайдаар ахлуулан байгуулсан.
Үүний дагуу Эрүүл мэндийн сайд, Улсын Онцгой Комиссын ажлын хэсгийн ахлагч Н.Удвал Эбола вируст халдвараас сэргийлэх, бэлэн байдлыг хангаж ажиллах салбар дундын нэгдсэн төлөвлөгөөг батлан, хэрэгжүүлэн ажиллаж байна.
Энэ ажлын хүрээнд өнөөдөр /2014.12.02/ “Эбола вируст халдварын бэлэн байдал, хариу арга хэмжээний талаар сургагч багш бэлтгэх” сургалт Халдварт өвчин судлалын үндэсний төвд боллоо.
ДЭМБ-ын Номхон далайн баруун бүсийн зөвлөх Др.Тилака Чиннаяа, ДЭМБ-ын зөвлөх Др.Луо Дапенг нар удирдан явуулсан. Тэд энэ сарын 01-05-ны өдрүүдэд ажиллах бөгөөд манай улсын эбола вируст халдварын бэлэн байдлыг хангах үйл ажиллагаанд мэргэжил, арга зүйн зөвлөгөө өгч ажиллана.
Уг сургалтад Эрүүл мэндийн яам, Батлан хамгаалах яамны Зэвсэгт хүчний жанжин штаб, Мэргэжлийн хяналтын ерөнхий газар, Хилийн мэргэжлийн хяналтын газар, , Цагдаагийн ерөнхий газар, Халдварт өвчин судлалын үндэсний төв, Зоонозын өвчин судлалын үндэсний төв, Нийслэлийн эрүүл мэндийн газар, Батлан хамгаалах, хууль сахиулах алба хаагчдын нэгдсэн эмнэлэг, Иргэний харьяалал, шилжилт хөдөлгөөний ерөнхий газрын Буянт-Ухаа дахь газар зэрэг байгууллагын 40 орчим төлөөлөгч оролцлоо.
Сургалтаар оролцогчид эбола вируст халдварын бэлэн байдал, хариу арга хэмжээг авах, дэгдэлт тандалтыг хэрхэн зөв хийж, эрсдэлийг үнэлэх, хилийн нэвтрэн орох цэгийн бэлэн байдлыг хангах, тус халдварын дэгдэлт болон хариу арга хэмжээний дэлхийн болон Номхон далайн баруун бүсийн өнөөгийн байдал зэрэг олон сэдвийн хүрээнд мэдлэгтэй болж, олон улсын туршлагыг өөрийн орны нөхцөл байдалтай харьцуулан ололт, дутагдлаа ярилцсан юм.
Өнөөдрийн танхимын сургалтаар оролцогчид онолын мэдлэгээ батжуулсан бол маргааш буюу 2014 оны 12 дугаар сарын 03-ны өдөр Чингис хаан олон улсын нисэх буудалд зохион байгуулагдах “Эрүүл мэндийн асуудалтай холбоотой үүссэн онцгой байдал буюу код 9” сэдэвт салбар хоорондын хамтарсан үзүүлэх сургуулилтаар практик дадлага эзэмших юм.
Энэхүү үйл ажиллагаанд Эрүүл мэндийн яам, Батлан хамгаалах яам, Онцгой байдлын ерөнхий газар, Иргэний нисэхийг ерөнхий газар, Тагнуулын ерөнхий газар, Цагдаагийн ерөнхий газар, Иргэний харьяалал, шилжилт хөдөлгөөний ерөнхий газар, Хил хамгаалах ерөнхий газар, Мэргэжлийн хяналтын ерөнхий газар, Хилийн мэргэжлийн хяналтын газар, Хан-Уул дүүрэг, Халдварт өвчин судлалын үндэсний төв, Боомтын захиргаа, Буянт-Ухаа дахь ХМХА, Буянт-Ухаа боомт дахь Гаалийн газар, Иргэний харьяалал, шилжилт хөдөлгөөний ерөнхий газрын Буянт-Ухаа дахь газар, “Чингис хаан” ОУНБ, Иргэний агаарын тээвэр дэх Цагдаагийн хэлтэс, “Монголын иргэний агаарын тээвэр” ХК, “Аэро Монголиа” ХХК, “Хүннү эйр” ХХК, Кореан эйр, Айрчайна, Айрофлот, Туркишэйрланс зэрэг байгууллага оролцоно.