Монгол Улсын Эрүүл мэндийн сайдын 2010 оны 386 дугаар тушаалаар батлагдсан “Монголын уламжлалт анагаах ухааныг хөгжүүлэх хөтөлбөр”-ийн дунд хугацааны үнэлгээг Эрүүл мэндийн яамны Төрийн нарийн бичгийн даргын баталсан удирдамжийн дагуу 2014 оны 06-08 дугаар сард хийж гүйцэтгэлээ.
Хөтөлбөрийн үйл ажиллагаа, хэрэгжилттэй танилцах зорилгоор БХЗГ-ын ЭТХ, ДЭМБ-ын холбогдох албаны хүмүүстэй уулзан, мэдээлэл авсан. Мөн хөтөлбөрийн хэрэгжилтийг дараах газруудад очиж танилцсан. Үүнд: УБ хотын Уламжлалт анагаахын шинжлэх ухаан, технологи, үйлдвэрлэлийн нэгдэл /корпораци/, Дорноговь, Говь-Алтай, Завхан аймгийн Уламжлалт анагаахын төвүүд
Хөтөлбөрийг 2011-2015 онуудад хэрэгжүүлэх 22 заалт бүхий арга хэмжээний төлөвлөгөөг боловсруулж, төлөвлөгөөний хэрэгжилт 2014 оны эхний 8 сарын байдлаар 79.1 хувьбайна. Тус хөтөлбөрийн дунд хугацааны үнэлгээний дүнг Эрүүл мэндийн яамны Удирдлагын зөвлөлийн хурлаар 2014 оны 11-р сарын 13-ны өдрийн хурлаар хэлэлцүүлэн, хурлаас гарсан шийдвэрийг холбогдох газар, хэлтэст хүргүүлсэн.
“Монгол уламжлалт анагаах ухааныг хөгжүүлэх хөтөлбөр”-ийн дунд хугацааны үнэлгээний дүгнэлт:
Хөтөлбөрийн хэрэгжилтийг үнэлэх шалгуур үзүүлэлтийг тооцоолон гаргахад бэрхшээлтэй, мэдээллийн эх үүсвэр, хөтөлбөрийн хэрэгжилтийг нэгдсэн удирдлага, арга зүйгээр хангах байгууллага байхгүй байна.
УАУ-ны төв ажиллаж байгаа аймгуудад байгууллагын нэр, удирдлага, зохион байгуулалт харилцан адилгүй, төвийн ажиллах бүтэц, дүрэм тодорхойгүй буюу байхгүй, нэгдсэн мэргэжил арга зүйгээр хангаж буй удирдлага зохицуулалт хангалтгүй байна.
Япон улсын Ниппон сангийн буцалтгүй тусламжаар “Уламжлалт анагаах ухааныг дэлгэрүүлэх” төслийн хүрээнд “Өрхийн эмийн сан” төслийг 2004-2011 онд хэрэгжүүлж, Эрүүл мэндийн сайдын 2011 оны 272 дугаар тушаалаар тус төслийг 2012 оноос төсвийн хөрөнгөөр үргэлжлүүлэн хэрэгжүүлэхээр заасан боловч хөтөлбөрийг хэрэгжүүлж буй талаар одоогоор ямар нэг мэдээлэл байхгүй байна.
Боловсрол, соёл, шинжлэх ухааны сайдын 2010 оны 235-р тушаал, Боловсрол, шинжлэх ухааны сайдын 2014 оны А/78-р тушаалуудад УАУ-ын бага эмч гэх мэргэжлийн чиглэл, индекс байхгүй байтал сургалт эрхэлдэг байгууллагууд Уламжлалт анагаахын бага эмч бэлтгэж байгаа нь сайдын тушаал болон Эрүүл мэндийн салбарын хүний нөөцийн бодлогын төгсөлтийн өмнөх сургалтаар бага эмчийг дэмжихгүй байгаа бодлоготой зөрчилдөж байна.
Уламжлалт анагаах ухааны чиглэлээр хийгдэж буй судалгаанд фитохими, фармокологи, түүх судрын судалгаа давамгайлж, эмнэлзүйн туршилтат болон бодлого, тогтолцооны судалгаа цөөн хийгдэж байна.
Үндэсний эмийн үйлдвэрүүдийг Эм үйлдвэрлэлийн зохистой дүрэм (GMP)-ийн түвшинд хүргэх, эм үйлдвэрлэлийн технологийг сайжруулахад анхаарах нь чухал байна.
Хөтөлбөрийн дунд хугацааны үнэлгээний дүнгээс дараах санал, зөвлөмжийг дэвшүүлж байна.
Аймгуудын УАУ-ны төвүүдийн бүтэц, үйл ажиллагааг тодорхой болгох
Уламжлалт анагаахын тусламж, үйлчилгээ үзүүлдэг байгууллагуудыг мэргэжил, арга зүйн нэгдсэн удирдлагаар хангах эрх зүйн орчинг бүрдүүлэх
УАУ-ын салбарын онцлогийг харгалзан бүтэц, орон тоог оновчтой болгож “Эрүүл мэндийг хамгаалах технологи-Уламжлалт анагаах ухааны ор бүхий эмнэлэг, амбулаторийн бүтэц, үйл ажиллагаа” MNS 5700:2006 стандартыг шинэчлэн боловсруулах
Уламжлалт анагаахын чиглэлээр төгсөлтийн дараах сургалтыг зохион байгуулахад Эрүүл мэндийн салбарын хүний нөөцийн бодлогод нийцсэн үйл ажиллагаа явуулах
“Монголын уламжлалт анагаах ухааныг хөгжүүлэх хөтөлбөр”-ийг 2015-2018 онд хэрэгжүүлэх үйл ажиллагааны төлөвлөгөө боловсруулах батлуулах
Хөтөлбөрийн 2015-2018 оны хэрэгжилтийг үнэлэх шалгуур үзүүлэлтийг шинэчлэх боловсруулах
УАУ-ны төвүүдийн эрдэм шинжилгээ, судалгааны лаборатори, сургалтын баазтай болох зэрэг асуудлыг шийдвэрлэх
Төрөөс уламжлалт анагаах ухааныг дэмжих бодлого, Засгийн газрын үйл ажиллагааны хөтөлбөрийг хэрэгжүүлэх үүднээс уламжлалт эмийг бүртгэлд хамруулах үйл ажиллагааг идэвхжүүлэх
