“Эмнэлгийн яаралтай тусламжийн өнөөгийн байдал, цаашдын чиг хандлага” сэдэвт Монголын яаралтай тусламжийн мэргэжилтний үндэсний чуулган 2014 оны 11 дүгээр сарын 13-14-ний өдрүүдэд Эрүүл мэндийн яамнаа зохион байгуулагдаж байна. Тус чуулганаар хот, хөдөөд ажиллаж байгаа эмч, мэргэжилтнүүдийн мэдлэг ур чадварыг дээшлүүлэхэд чиглэж, мөн яаралтай тусламжийн цаашдын чиг хандлагыг тодорхойлох, тусламж, үйлчилгээний чанарыг сайжруулах чиглэлээр хэлэлцүүлгүүд зохион байгуулагдах ажээ. ЭМЯ-ны Яаралтай тусламжийн мэргэжлийн салбар зөвлөл, Эрүүл мэндийн хөгжлийн төв, Монголын яаралтай тусламжийн хөгжлийн нийгэмлэг ТББ хамтран “Яаралтай тусламжийн мэргэжилтнүүдийн чуулга уулзалт”-ыг зохион байгуулж байна.
Чуулга уулзалтад Эрүүл мэндийн сайд Н.Удвал, ЭМЯ-ны БХЗГ-ын дарга Я.Буянжаргал болон аймаг, дүүрэг, төв эмнэлгүүдийн яаралтай тусламж, гамшгийн асуудал хариуцсан мэргэжилтнүүдийн төлөөлөл болсон 200 гаруй эмч, эмнэлгийн ажилтнууд оролцож байна. Сайд чуулганыг нээж үг хэллээ. Тэрээр “Та бид яаралтай тусламж, үйлчилгээг шуурхай, чирэгдэлгүй, чанартай үзүүлж чадвал хэн нэгний нэг насны амьдралыг аварч байна гэсэн үг юм. Өвчтөнд эмнэлгийн анхны болон яаралтай тусламжийг хэрхэн үзүүлснээс өвчтөний амь насыг аврах, цаашдын тавилан нь хамаардаг.
Монгол Улсын хүн амын нас баралтын зонхилох шалтгааны дотор яаралтай тусламж шаардлагатай цусны эргэлтийн тогтолцооны өвчин, осол гэмтэл орж байна. Мөн түргэн тусламжийн дуудлагын тоо жил ирэх тутам нэмэгдэж байна. Иймд ЭМЯ 2013 оноос Эмнэлгийн яаралтай тусламжийн Ерөнхий мэргэжилтэн, мэргэжлийн салбар зөвлөлийг шинээр байгуулж, хөтөлбөр, стратегийн хэрэгжилт, Эрүүл мэндийн байгууллагын гамшгийн бэлэн байдал, хариу арга хэмжээг хангах зорилгоор ЭМХТ-ийн яаралтай тусламжийн зохицуулалтын хэлтэс, аймаг, нийслэлийн ЭМГ-т яаралтай болон онцгой байдлын асуудал хариуцсан мэргэжилтэн ажиллуулж байна.
Эрүүл мэндийн сайдын 2014 оны 49 дүгээр тушаалаар батлагдсан мэргэжлийн индекст “Яаралтай тусламж судлал” орсноор мэргэшсэн эмч, сувилагч бэлдэх нөхцөл бүрдэв. Энэ онд анхны 12 эмчийг сургаж эхэллээ. Мөн БНСУ –д аймаг, нийслэлийн 29 эмчийг яаралтай тусламжийн чиглэлээр сарын хугацаатай сургасан бөгөөд энэ онд 2300 гаруй эмнэлгийн болон эмнэлгийн бус хүмүүсийг амилуулах болон лавшруулсан яаралтай тусламжийн сургалтад хамрууллаа.
Гэвч бид олсон амжилтаа бататгах, ажлаа эрчимжүүлэх, яаралтай тусламж, үйлчилгээний тогтолцоо, менежментийг сайжруулах, санхүүжилтийг нэмэгдүүлэх, даатгалд хамруулах, техник, багаж, тоног төхөөрөмжийг шинэчлэх, боловсон хүчний мэдлэг, чадварыг дээшлүүлэх улмаар олон улсын жишигт ойртсон нэгдсэн тогтолцоо бий болгох чиглэлээр ажиллах шаардлагатай байна.
Энэхүү чуулганаар та бүхэн харилцан мэдээлэл, туршлагаа солилцон идэвхтэй оролцож, ард иргэддээ яаралтай тусламжийг чирэгдэлгүй хүргэхийн төлөө хамтран ажиллацгаая.
Чуулганы үйл ажиллагаа цаашид уламжлал болон тогтвортой үргэлжилж, чуулганаас гарсан үр дүн нь Монгол улсын эрүүл мэндийн салбарт хувь нэмрээ оруулах болно гэдэгт миний бие итгэлтэй байна.”гэлээ.
Тус чуулган зохион байгуулагдсанаар Засгийн газрын 2010 оны 318 дугаар тогтоолоор “Түргэн тусламжийн үндэсний сүлжээ хөтөлбөр”, Эрүүл мэндийн сайдын 2012 оны 375 дугаар тушаалын 5 дугаар хавсралтаар “БОЭТ, Нэгдсэн эмнэлгийн яаралтай тусламжийн тасаг, нэгжийн үлгэрчилсэн журам”, мөн 2013 оны 469 дугаар тушаалаар батлагдсан “Яаралтай тусламжийн шинэчлэл стратеги”-ийн хэрэгжилтийг эрчимжүүлэхэд түлхэц болох юм.
